Thenzawla sangha chi tihpunna leh a khawina hmun sak enfiah

Thenzawla sangha chi tihpunna
leh a khawina hmun sak enfiah
Mizoram Legislative Assembly Subject Committee-I chuan Thenzawl NEC Road-a Fisheries department-in PMMSY Scheme hnuaia sangha chi thlahna hmunpui, hatchery leh a khawina hmun – brood bank an siam mek a hmunah tlawhin, hmalakna kal mek an enfiah.
Subject Committee-I hi an chairman Lalmuanpuia Punte, hoa kal an ni a. Members – K Laldawngliana, Lorrain Lalpekliana Chinzah, Rashik Mohan Chakma leh Jeje Lalpekhlua an tel a. Assembly Secretariat hotuten an tawiawm. Fisheries secretary Er Rothanga hoin department hotuten an lo dawngsawng a ni.
Committee chairman chuan, hmalak dan enfiah tura kal an ni a, an hmuh dan hi sawiho leh a ni anga, chuta an thil hmuh dan leh rawtna chu Assembly-ah an thlen dawn tih a sawi.
Fisheries department hotute sawi danin, DFDO Serchhip hnuaia Thenzawla hatchery leh brood bank siamna atan hian cheng vaibelchhe 4 sen a ni tawh a; a la puitling lo a, tunah hian cheibawl zuina leh a puitlin theihna atan ruahmanna siam niin, hemi atan hian NABARD atangin vaibelchhe 8 chuang hmuh beisei a ni a, sanction erawh a la chhuak lo.
Subject Committee hian brood bank atana helai hmuna hnathawh tawh hrang hrang – quarters, staff guest house, office cum laboratory, entrance gate, internal roads, boundary wall fencing, hatchery, nursery tanks leh rearing tanks an fang chhuak a ni.