AMC Inspection…

Nimina AMC Board of Councillors thukhawm chuan AMC area chhunga restaurant, hotel leh hostel te an thianghlim dan leh inenkawlna a felfai em tih endik thin ni rawh se, tiin an rel a. Heng restaurant, hotel leh hostel te hi AMC Licensing Regulation 2012 hnuaia register an nih avangin AMC thuneituten an endik hi thil kalphung tur pawh a ni a; hetianga hmalakna an kalpui tur hi a lawmawmin an fakawm hle a ni.
Kan khawpuia restaurant tam tak hi chu ner ner chunga pan loh theih loh ni si an ni nual hlawm a. Bungbel an vawn fai leh fai loh te, an tui hman a thianghlim leh thianghlim loh te, restaurant leh a huam chhung chhehvel an vawn fai leh fai loh te, ei leh in an sawngbawl dan leh dawrtute an serve dan a thianghlim leh thianghlim loh te endik ngai ngawih ngawih hi a tam zawk hi an ni hialin a rinawm.
Hetih lai hian, ram changkanga an kalpui thin anga changkang leh thianghlim restaurant pawh tam tak a awm tawh. Chutih rualin, mipui nawlpuiin an pan phak restaurant-te hi chu endik ngai lehzual an ni awm e. Hotel lamah hian hma kan sawn ta hle a, a hmunhma leh service dang hi chu a tha pawh a ni thei e, thianghlimna endik tur a nih miau avangin thianghlimna lamah hmasawnna tur chu an nei hlawm ngeiin a rinawm.
AMC-in thianghlimna ngai pawimawha hetianga hma a lak phawt chuan, khawpui pawh a thianghlim sawt dawn tihna a ni nghal a, kan thianghlim na na na chuan, mipui pawh kan lo hrisel zawk bawk ang a, hriselna chuan hmasawnna leh hausakna a keng tel nghal bawk a, a hlawkthlak dawn hle a ni.
Hetih rual hian, AMC leh health services lam pawhin coordination fel tak an neih a pawimawh dawn a, inspection atana criteria siam chungchangah insu buai lo tura ruahmanna siam tlan pawh a ngai ngeiin a rinawm a. Hostel chungchangah hian education department lamin hostel management rules 2016 an lo siam tawh a, hemi chungchangah pawh hian AMC nen coordination fel tak an neih a pawimawh dawn hle niin a lang.