American tithlabar thintu Unabomber thi ta

Ted Kaczynski, Unabomber (university leh airlines bomber tihna) tia hriat hlawh zawk chu a tanna Lung Inah thia hmuh a nih thu US federal officials te chuan an sawi.
Kaczynski hi kum 81 mi ni tawhin mi pathum a tihlum a, mi 23 hliam a tawrhtir bawk a, kum 1978 atanga 1995 chhung khan mail-bombing turu tak a kalpui a ni.
Kum 1996 khan jail atanga chhuak thei miah lo tuin dam chhung lung in tang tura tih a ni a, a pawi khawih atanga kum 20 hnu velah man theihin a awm chauh a.
Harvard university chhuak mathematician turu tak hi Montana cabin ah man a ni ta hlauh zawk a. Kum sawm tam chu America-ah chuan a chungchang sawi hlawh ber niin amah kaihhnawih TV documentary thahnem tak siam a nih phah bawk.
Tun hnai kum sawm thum chhungin Kaczynzksi hi US-a lung in pathumah tantir a ni a, a tanna hnuhnung ber chu Federal medical Center, Butner, North Carolina-ah a ni.
Prison guards te chuan kar kalta Inrinni zing lam khan Kacziynski hi thiin a tanna chhungah an hmu tiin US Bureau of Prisons te chuan an sawi a. Eng vanga thi nge tih sawi chian a la ni lo.
“Hmuh a nih veleh a nunna chhan tuma beih nghal a ni a, EMS hmangin local hospital panpui nghal niin damdawi inah hian thia puan a ni zui ta a ni,” tiin thuneitute chuan an sawi.
A hriselna a tlakhniam zel avangin December 2021 khan tuna a tannaah hian dah a ni zawk a, a hma chuan Florence, Colorado-ah federal Supermax prison-ah May 1998 atang khan a tang char char zawk a ni.
Kaczyski suahsual rawngbawl in a hun laiin US a nghawng hneh hle a, a chetlak dan hmang avangin American posted letters hmelhmang thlak danglamin a awm phah vek bawk a ni.
Washington Post leh New York Times te chu a thinrim manifesto ziah ‘Industrial Society and Its Future’ tih chu kum 1995 khan chhuah lo thei lovin a siam thei hial a.
US chanchinbu lian pahnih te hian FBI te ngenna leh US attorney general te ngenna avangin an chhuah a, an chhuah chhan ber pawh a manifesto chu tihchhuah a nih chuan a suahsual rawngbawl campaign tihtawp a intiam vang a ni.
A thuziah chu 25,000 word lai niin modern life leh technology te chu Americans te inlahrang leh thiltithei lova siamtuah a puh a.
He a paper hi Kaczynski unaupa leh a nupui tena an chhiar hnuah a thuziah dan hmang atang chuan ringhlelin FBI an hrilh nghal a, April 1996 khan Lincoln, Montan-ah a cabin-a a awm lai man a ni ta a ni.
A cabin chu journal hrang hrang coded diary, puak thei chi hrang hrang leh bomb siam zawh tawh pahnihin a a khat bawk.
Kaczynski chetlak dan hi a mak hle a, politics thil lam pawh a awn lem lo tia sawi a ni a, revolutionary lam rilru pawh a pu lo an ti bawk a. Ama thuziah ngeiah chuan mihring te tana thil tha zawk a duhna lam aiin phuba lak duhnain a hneh vang zawk tiin a sawi.
A suahsual intanna ber nia ngaih chu a unaupain an chhungkaw sumdawnna atangin a hmeichhe thawhpui tum hnih an in date hnua a hmeichia ina duh tak loh avanga ngeiawm deuh deuha a chetlak zui avanga a ban atanga intan tia sawi a ni a.
Chuta tang chuan Montana ram ngaw ah inpuchhuakin chutah chuan cabin a sa a, cabin tihlumna emaw plumbing emaw electricity pawh a nei hek lo.
A pawi khawih hmasak ber chu Illinois-a Northwestern university a ni a, 25 May 1978 ah a bomb hmasa ber a, a hnu kum khat dawnah 9 May 1979 ah bomb a tipuak leh bawk a, mi pahnihin hliam an tawrh phah a.
November 1979 khan altitude-triggered bomb a siam mail hmanga a thawn chu American Airlines flight ah puakin meikhu nasa lutuk a siam vangin mi 12 in buaina an tawh phah a ni.
Heng avang te hian FBI te chuan Unabomber tiin an sawi mai a, a tum ber chu university leh airlines lam a nih vang a ni. A hnu lamah tum 13 pawikhawihna nei lehin mi pathumin nunna an chan phah a. Nunna chan te hi computer rental store owner Hugh Scrutton, advertising executive Thomas Mosser leh timber industry lobbyist Gilbert Murray te an ni.
Kaczynski chung thu ngaihtuahnaah Mosser nupui chuan a pasal chu an chhungkua tana Christmas tree la tura a kal laiin a nih thu a sawi a ni.
Lehkhathiam leh thluak \ha turu a ngaih niin naupang a nih laia a IQ pawh 167 lai niin pawl hnih bawhkan hial thei niin kum 16 mi lek a nihin Harvard University a lut tawh a ni.
FBI agent te chuan ‘twisted genius turu famkim nih tum’ tiin an sawi a, Lung in a tan hnuah amah enkawltu psychiatrist chuan paranoid schizophrenic a nei a ti.
An chhungkua member leh modern society te chuan amah chu hnualsuat leh tiduhdahah a inngai tia sawi a ni bawk a. Kaczynski chuan a thil tih leh chetna te chu a duh vang renga ti a nih thu sawiin lung inah pawh intihhlum tum tawh a ni bawk.