Zelensky-an Ukraine-in beihpui thlak tan ti

Ukraine President Volodymyr Zelensky chuan an ramin a nghahlelh em em Russia nawrletna chu an tan ta tiin a sawi.
“Beihletna leh invenna kan kalpui tan a ni,” tiin Zelensky chuan a sawi a. Mahse, engtiangin nge an kal dan tur kimchang chu a sawi loh tur thu a sawi zui bawk a.
Hetih lai hian Ukraine chhim lam leh khawchhak lamah chuan inbeihna a nasa hle sa a, hei hi Ukraine-in beihpuithlak a tum niawma sawi lawk in a hrin nia sawi a ni a.
Ukrainian sipaite chu Bakhmut bul khawchhak lamah leh chhim lama Zaporizhzhia lamah hma an sawn nasa a, Russia hmun te chu long-range rocket te hmangin an bei nasa tia sawi a ni a.
Mahse thil awm dan dik tak hriatfiah har tak niin Ukraine leh Russia te chuan sawi dan dang an neih ve ve vang a ni a, Ukraine-in hma a sawn thu a sawi laiin Russia-in a chhang let thei a inti ve reng thung.
Hetih lai hian Moscow chhehvel chhim lam district ramri hnaih Kaluga region governor Vladislv Shapsha chuan Stelkovk khuaah drone a tla tiin a sawi a, hei hi erawh independent a finfiah a ni lo thung a.
Russian president Vladimir Putin chuan kar kalta Zirtawpni khan video interview a neihah Ukrainian forces te chuan beihpui an thlak tan thu leh mahse lo danchah niin nasa taka tuara chan an neih tam thu a sawi a.
Inrinni khan Canadian PM Justin Trudeau nena an inbiaknaah Zelensky thung chuan Russian leader thusawi chu ‘interesting’ tiin a sawi thung a.
Dar chhin akin leh mit vun san paha Putin hre lo ang deuha awmin Zelensky chuan Russia hian an daih rei dawn tawh lo tih an inhriat a ngai tiin a sawi.
Ukraine military commander te chu an dinhmun a that thu sawiin “Chu chu Putin hrilh rawh u,” tiin a sawi bawk.
Trudeau chuan Ukraine puih nan Canadian dollar 500 million chu Ukraine in ralthuam lam a tihphuisui theih nan a pek thu a sawi nghal bawk a.
Thuchhuah intawm siam zuiah Canada chuan Ukraine-in Nato member nih a dilna chu a thlawp dawn tia sawiin July thlaa Nato summit Vilnius khawpuia neih hunah sawihona neih a ni ang a ti bawk a.
Hetih lai hian chhim lama Zaporzhzhia region-ah chuan inbeihna a nasa hle a, Russian officials te chuan Ukraine forces te chuan Sea of Azoz pawh an tum thu sawiin chu chu an tithei a nih chuan Russian force-te chu tihphelin an awm dawn a ni.
Ukraine hma lam panna hi kar kalta lawka Nova Khakovka dam tihchhiat avanga tuilian nasa tak a thlen avangin a tihnufual thei dawna ngaih a ni thung a. Tuilian hian Dnipro River chhehvelah 230 square miles lai a huam a ni.
Nato leh Ukraine te chuan Nova Khakovka dam hi Russia-in a tihchhiatah an puh a, Russia erawhin Ukraine a puh ve hlauh thung.
Hetih lai hian kar kalta Zirtawpni leh Inrinni zan khan Russia chuan chhim lama Ukraine khawpui Odesa chu missile hmangin a bei a, mi pathumin nunna chanin hliam an awm nual bawk a. Poltava central region-ah pawh Russia-in airfield a bei tel bawk a.
Odesa beihnaah hian Russia chuan darkar ruk zet hun hmangin land-based missile pariat leh drone 35 a hmang a, Ukraine air defence chuan cruise missile pahnih leh drone 20 a kap thla hman thung.