Thalaite hna tur buaipuiin thawk ho dawn

Mizoram International Centre for Innovation & Skills Excellence dinna atan sawrkar laipui Ministry of Skill Development and Entrepreneurship (MSDE) kaihhruaina hnuaiah National Skill Development Corporation (NSDC), Mizoram Labour Employment Skill Development & Entrepreneurship (LESDE) Department leh Medhavi Skills University te chuan kilthum atanga thawh hona thuthlung, Tri-partite MoU an ziak.
He thawhhona ziak tura Mizorama lokal, NSDC CEO Ved Mani Tiwari chuan hrileng avanga healthcare service leh sector dang engemawzat – hospitality, construction, logistics, information technology leh a dangteah eizawnna thar tam tak a piang tih sawiin, Asia ram changkang thenkhat leh Europe ram thenkhatah hnathawktu mamawhna a nasa zel a. India hmarchhak thalaite tan ramdanga thawhna tur remchang a inhawng zel, tiin, NSDC chuan Mizoram thalai eizawnna dapte tan theihtawpin hma a la zel dawn tih a sawi a ni.
Centre of Excellence (CoE) hian a hna hmasa ber atan India leh khawvel hmun hrang hranga hospitality sector leh paramedical staff leh nurse mamawhna sang zel phuhrukna turin hospitality leh healthcare skills lama hmasawnna tur course a kalpui dawn a, hospitality leh healthcare sector bakah a kaihhnawih sector dangte nen international skills training leh mobility a buaipui dawn a ni.
MoU ang hian NSDC chuan infrastructure support atan bungraw thahnem tak a pe dawn a. Hospitality & healthcare services lama talent tihpunna turin CoE tan knowledge partner angin a thawk anga, CoE-a zirchhuakte hi khawvel ram hrang hrangah hna hmuh sak turin NSDC-in hma a la dawn a ni.
He thawhhonaah hian LESDE department chuan CoE-a course awmte awareness siam turin promotional activities-a puiin, administrative support a pe dawn a. Medhavi Skills University hian nitin hnathawh dan enkawl hna a thawk anga, ram pum leh khawvel puma company hmingthang tak takte manpower mamawh phuhrukna tur international standard angin quality skill training pekna tur ruahmanna a siam dawn a ni.