I mut dan a dik em?

Mut hi kan taksain a mamawh thin a, kan mut rei zawng erawh a inang lo thei a,thenkhat chu darkar 24 chhungin darkar 5-6 te an mut chuan an harhvang viau tho a, thenkhat chuan darkar 6-8 mut te an mamawh ve thung thin. Hetihrual hian kan mut rei zawng ang chiahin, kan mut dan position chu a pawimawh niin Delhi-a ruh lam doctor, Dr Ashwani Maichang chuan a sawi.
Kan mut dan position a dik loh chuan hnung leh kawng kham te neiin, spinal problem kan neih phah theih laiin, mut dan a dik chuan spinal problem te pawhin a ziaawm phah ve thei bawk.
Mut dan dik lo langsar zual deuh te chu:
1. Bawkkhup a mut: Dul delh a, bawkkhup zawng mut hi mut dan position tha lo tak, hnung leh kawng kham leh na thlen thei a nih bakah nghawng kham te pawh a thlen thei a, a rei hnuah phei chuan heng na te hi a benvawn thei hial a ni.
2. Saisir zawnga mut kawm: Hetiang hi fetal position an ti a, nu pumchhunga nau awmdan ang deuh hi a ni a, saisir zawngin an mu kawm a, khup tawmin an zâng an tikum bawk a, hetianga mut hian hnungzang ruh hnuailam a nawr na bik thin.
3. Saisir zawnga ngil taka mut: Hei hi a chunga mut dan chi hnih tarlan te ai chuan a ziaawm zawk. Saisir zawnga ngil taka kan mut hian thisen luan dan a buai thei a, chubakah delh lam a zirin taksa peng thenkhat an hah bik thin.
Heng mut dan tha lo hrang hrangah hian tlema taksa awmdan siamrem deuhin, hnungzang ruh a tha lo zawnga a nghawng dan a tihziaawm deuh theih:
1. Saisir zawnga mut chuan khup leh khup inkarah lukham dah tur a ni.
2. Sleep apnea nei te nih loh chuan zangthal zawnga mut pawhin kaihza hnuaia lukham dah tur a ni.
3. Zangthala mut a tha kan tih rualin zankhuaa zangthal a mut ngar ngar erawh a tha chuang lo a, a chang changa saisir zawng zawnga insiam rem zeuh zeuh tur a ni.