Hnam chhan turin MNF hi a duap dui dawn lo – Lalruatkima

Zofaten hnam anga beih kan tawh mek laiin, hnam tana silai pawh lo lek tawh MNF hi a duap dui dawn lo tih minister Lalruatkima chuan a sawi.
Thawhtannia Kawnpuia Tuirial West Block MNF Conference neih a hmanpuinaah MNF adviser ni bawk Lalruatkima chuan Zofaten hnam anga beih kan tawh mek lai hian Pu Zoramthanga anga leader tha Mizo hnam hian a nei lo tia sawiin, “Ramin ri nei mah se, hnamin ri a nei lo. Sakhaw intibingten kan biak in thlengin an hal a, missionary leh Pastor te chenna in thlengin an hal. Tam tak min that bawk a, kan thinlung a rum a ni. Hmun hrang hranga awm Zofate tahna hi kan tahna a ni a, an mittui hi kan mittui a ni. An tan kan ding tlat zel dawn. Hnam tana silai lek ngam, martar tam tak awm tawhna party, ramri humhalh tura silai hmetpuak ngam hi hnam chhan turin kan duap dui lo ang,” a ti.
Zofaten zalenna meichher kan chhit tawh chu, thangtharte thinlungah Mizo hnam a awm chhung chuan Mizo nationalism hi a mit tawh dawn lo tih a sawi a. Zofa hmun hrang hranga thendarha awmte Isua Krista ringtu kan ni vekte chu a makin Pathian hnam hriat kan nihzia a chiang hle, tiin, “Tunah kan unaute Zofate Jerusalem-ah an lo haw mek a, an tawng a lo awn deuh a nih pawhin unau vek kan ni tih hrereng ang u,” a ti.
MNF chu a fing ber leh a tha ber leh sawisel kai lo an ni lo a, mahse, he ram hi MNF kutah Pathianin a dah tih Lalruatkima hian sawiin, hun harsaa he ram leh hnam enkawl tur hian Pu Zoramthanga sawrkar hi Pathianin a ring tawk tih a sawi. Tun sawrkarin manifesto a neihte tihlawhtling turin theihtawp chhuahin an bei a, an tihhlawhtlin pawh a tam tawh hle tih a sawi bawk. “Hun harsaa he ram kan kuta dah ngam Pathian hian hun tha leh thawl zawka he ram enkawl tur hian min ring tawk ang tih ka ring a. Policy-a buai lo, leader-a buai ve lo Pathian leh kan ram tan titu party hi kan sawrkar leh ngeiin ka ring,” a ti.