Admission tih dawnin ragging ti lo tura intiamna ziahtir tum

Serchhip district-ah zirlaiten ‘ragging’ lam rawngkai an tih lohna turin admission an tih dawnin intiamkamna siam tir rawt a ni.
District Level Anti-Ragging Committee Serchhip chu an chairman, bawrhsap Paul L Khuma hoin Nilaini khan an thukhawm a. Zirlai zinga intihduhdahna thleng, rilru leh taksa intihnat sakna (ragging/ bullying) thleng thin laka an him theihna tura hmalak dan tur sawiho niin, ruahmanna siam a ni.
Tun dinhmunah Serchhip district-a school zawng zawngah Anti-Ragging Committee leh Squad din a ni tawh tih district education officer chuan a sawi a. Thutkhawmah hian zirlaiten admission tih laiin ragging an ti dawn lo tih intiamna ‘Anti-Ragging Bond’ an ziah dan tur, ragging/ bullying tawkten awlsam zawka an complaint theih dan tur, institution tinin Anti-Ragging Report mumal taka an vawn dan tur, dan bawhchhiate chunga hremna kalpui dan tur sawi a ni.
Venhimna leh inzirtirna lam ti turin police-in thla tin school an tlawh /vil ) thin dawn a; awareness leh counseling session hrang hrang buatsaih thin a ni bawk ang.
Ragging chungchanga school tin hriat tur inkawhhmuhna leh criminal offence/ intimidation a nih theih dan inzirtirna ‘module’ siam turin additional DC Dorothy Muansangi kaihhruai Drafting Committee din nghal a ni bawk.
Thutkhawmah hian Serchhip SP Dhirendra Pratap Singh bakah DEO leh school hrang hrang headmaster /principal, Govt. Serchhip College zirtirtu leh Students’ Union hruaitute, DIPRO, CDPO leh khawtlang hruaitu YMA leh MHIP an tel.