Aris-an a nu Suu Kyi chhuah zalen ngen

Myanmar hruaitu pawn chhuak thei lova siam mek Aung San Suu Kyi fapa chuan sipaite chu Lung In atanga a nu chu chhuah zalen turin a ngen.
“Lung Ina nguai taka ka nu a awm hi ka remti lo a ni” tiin Kim Aris chuan an kawmnaah sawiin khawvel ram dangte chu tanpui turin a ngen bawk a.
Suu Kyi chu kum 2021 khan sipai ten a sorkar an paihthlak hnuah kum 33 lung in tang tura a chungthu relsak zuiin a awm a.
Khata tang khan Myanmar chu buainain zuiin civil war chhuakah mi sang tam takin nunna an chan phah tawh a ni.
Aris hi British national niin sipaite chuan a nu hriselna chungchangah pawh engmah hrilhhriatna an nei lo a ti a. Burmese embassy, British Foreign Office leh internatinal Red Cross te pawhin an pui thei lo tiin a sawi bawk a.
“A hma zawng chuan media emaw hnenah engmah sawi kan nei ngai lo,” tiin Aris chuan a sawi a. Kum 1098 atanga 2010 inkar kum 15 chhung vela a nu an man awn awn chang pawhin engmah sawi chhuah an nei ngai lo a ti bawk a.
“Politics thila kan inrawlh loh a tha zawk tih kan hria a. Ka nu pawhin inrawlh turin min duh hek lo. Tunah erawh hrem a ni tawh a, sipaite hi an che awm ang lo bawk a, ka duh ang ka sawi thei tawh a ni,” tiin a sawi bawk.
Nobel peace prize dawngtu Suu Kyi hi khawvela democracy icon langsar ber pakhat a ni a. Kum 2010 khan kum 15 hren a nih hnuah chuhah zalen niin Myanmar leh khawvelin a lawm hle a ni. Mahse, UN International Court of Justice (ICJ) ah Myanmar in Muslim Rohingya te laka hleilenna a kalpui thu ah Myanmar sorkar a tan avangin nasa taka sawiselin a awm thung.
Suu Kyi hi a sorkar paihthlak a nih hnuah pawn chhuak thei lova siam reng niin nikum khan capital Nay Pyi Taw-ah solitary confinement a dah a ni a. A chungchang hriat tur aawm lo va, a damlo tia khual thuthang a awm bawk a, mahse, sipaite chuan chu chu an hnawl thung.
Aris chuan khawvel ram te chu Myanmar buaina chingfel tura hma la tura ngenin ni tinin army te chuan civilian te lakah ralthuam hlauhawm puipui hmangin chet an la reng tiin an sawi bawk a.
Aris chuan khawvel ram dang te chuan sipai tena ralthuam an neihbelh zel loh nan hma an la theia, sipaite do tute pawh an pui zawk thei a ni tiin a sawi. Khawvelin a hrek chungin Myanmar hian ralthuam a duh leh mamawh ang te chu a la nei thei zel tho a ni.
Aris chuan a nu chhuah zalen a nih theih nana nasa zawka hma la tura ngen bawkin khawvel chu Myanmar mipui harsatna nasa tak tawka awmte tanpui turin a ngen bawk a, Myanmar mipuite chuan harsatna namen lo an tawk mek tiin a sawi bawk.
Aris leh a unaupa te chu kum 1988 a “the Lady” tia hriat lar Suu Kyi-in UK atanga Myanmar-a a nu upa tawh hrisel lo tak enkawl tura a kalsan atangin an awm hrang deuh reng a ni ber a.
Suu Kyi hi Burma independence hero General Aung San fanu niin Myanmar dictatorship duh lova pro-democracy movement kalpuitu a ni a. National League for Democracy (NLD) dintu niin kum 1989 khan house arrest a dah a ni a.
Kum 1991 khan an ram a let leh an phalsak loh a hlauh avangin Myanmar a chhuahsan duh lo va. Khatih lai khan a fapa Aris chu kum 14 chauha upa niin a nu Suu Kyi aiawhin Nobel Peace Prize pawh a lo dawnsak nghe nghe a ni. Suu Kyi hian a pasal cancer avanga kum 1999 a thi ta pawh hmu turin a kal duh lo va, a chhan ber chu sipai ten an rama a let leh an remtih loh a rin vang a ni.
A fapa Aris chuan kum 2010 khan a nu chu Myanmar a tlawhin a hmu a. A nu a kalsan dawnin Yangon-a market atanga uite a lei a pe a.
“Bawm chhunga an dahkhawm ui note zinga a harh awm chhun a ni a, ka la ta a ni,” tia sawiin Aris chua, “Ka nu ka pek hnuah tun thlengin ka nu thian tha a ni ta reng mai,” tiin a sawi.
Kum 2015 khan Suu Kyi chu NLD te inthlanah chakna a chanpui hnuah hotu lu bera dah niin Myanmar-in kum 25 chhunga inthlan a hmachhawn hmasak ber a ni bawk a. Sipai ten a sorkar an paihthlaksak hnuah pawh Myanmar ah chuan Suu Kyi aia lar an la awm chuang lo.
“Sipaite hian he indonaah hian chakna an chang ngai lovang. Engtianga rei nge an awh theih dawn tih chauh zawk a ni” tiin Aris chuan a sawi a, “A rang thei ang bera ka nu hnena thuneihna an hlan let a, democratic hmanga mipui sorkar a pian ran loh leh ramin hmasawnna kawng a zawh hma a ni mai,” tiin Aris chuan a sawi bawk.