Boruak him lo vangin Pentagon khar, ching fel lehnghal

Pentagon-a ‘boruak him tawk lo’ a awm nia hriat avanga khara hazardous material (hazmat) response team-te tirh luh an nih hnuah a pangngaiin hna thawh zui leh a ni.
Building-a system-te chuan Ningani zing khan ‘air quality lama harsatna awm thei a nih thu an hmu a, fimkhur taka himna tur ruahmanna kalpuiin endik nghal a ni’ tih Pentagon thupuangtu, Sean Parnell-a chuan thuchhuah siamin a tar lang.
“A hnua test-naah hian hlauhawm a awm lo tih finfiah a ni a, a pangngaiin hna pawh kalpui leh a ni tawh,” a ti.
Thil thleng lai hian building chhunga police-te chuan gas mask leh chemical protective gear kimchang nen an inthuam niin US chanchinbute chuan an tar lang.
Pentagon hi Arlington Fire & EMS chuan an pui tih social media-ah tar langin thil hlauhawm thleng palh thei hi an buaipui tih an sawi.
A hmain Parnell-a hian US Department of Defense headquarters awmna building-ah hian ‘a nghawngna hmuna awmte hmun himna awmna tur thupek telin tih dan tur zam sa’ siam anga thil kalpui a nih thu a sawi.
Ningani chawhma dar 11:00 (India-a zan dar 08:30) hma lawkin Pentagon Force Protection Agency chuan Pentagon mi leh sate hnenah email a thawn a, a chhawng hnihna atanga a pangana thlenga corridor palia inkhuar turin an ti.
Email-ah hian staff-te chu thupek zawm turin a hrilh a, inbiak ngai pawh virtual-a ti turin hrilh an ni bawk tih CBS News-in a tar lang.
Parnell-a chuan chhun dar 01:30 (India-a zan dar 11:00) vel khan thuchhuah thar tichhuakin, “A buaipui hmasatute chungah lawmthu kan sawi tak meuh meuh a ni,” a ti.
Washington DC khawpui pawn lam, Virginia hmar lama awm, Pentagon-ah hian sorkar hnuaiah mi 20,000 chuang zetin hna an thawk a ni.