Congress party zawm ta, chief secretary hlui Lalnunmawia Chuaungo chuan Mizoram Lok Ayukta-in state sawrkar hnena CBI rawih phalna a dil chu tum hnih hnawl a ni tawh tih a sawi.
Zirtawpnia Congress Bhavan-a political session-ah Lalnunmawia Chuaungo chuan, CBI ruai turin state sawrkar phalna lak a ngai a. Lok Ayukta-in CBI rawih phalna vawi hnih state sawrkarah a dil tawh a, mah se, phalna an la hmu lo tih sawiin, “Pu Lalsawta hoa sawrkarna kan siam chuan chhui kan ngam dawn a, chhui ngai tur erawh kan ni ve dawn lo,” a ti.
Eirukna nuaibo tura hmanraw tangkai tak chu Lok Ayukta a ni tih a sawi a. Mizoram Lok Ayukta chu Congress sawrkar hunlaia din a nih thu te, Anti-Corruption Bureau (ACB) chu Vigilance department chan, chief minister enkawl a nih avangin hotu lian chhui turin harsatna a awm phah thin thu te a sawi. Congress party-in sawrkarna a chang a nih chuan Lok Ayukta-ah ama puala chhui theihna (investigation) nei turin hma an lak tur thu a sawi.
Party tinah MLA fel tak tak awm teuh mah se, chief minister berin a zir loh chuan ramin hma a sawn dawn chuang lo, tia sawiin, “Chief minister tha kan mamawh. Chief minister tha kan neih theihna turin ngaihtuahna fim tak hmang turin Zoram mipui ka chah duh a; party tinte hian an manifesto-ah enge an dah tih hi zirchian a ngai. Hmasawnna ngelnghet engtin nge kan thlen ang, tih kan ngaihtuah a tul a ni,” Lalnunmawia Chuaungo hian a ti.
MNF leh Congress chu Mizorama party ruhrel lian ber an nih rualin, sawrkar tur chuan neutral vote a pawimawh thung tih sawiin, Pu Lalsawta chu Mizoram mipui rin ber niin a sawi. Sawrkar kalphung thlak a, siamtha thei ber tur chu chief minister an nih miau avangin tunge chief minister atana tha ber ang, tih thlir chunga vote thlak turin mipui zirtir a pawimawh tih a sawi. Lalsawta chu thil te thamah a rinawm a, thil lianthamah pawh a rinawm tih a sawi bawk.
Mizoram sawrkarin CBI rawih dilna tum hnih a hnawl tawh – Lalnunmawia Chuaungo
Get real time updates directly on you device, subscribe now.
Next Post