Mizo thalai IAS nih tum ruh tlat kan ngah tawh – MYC chairman

Mizo thalai zingah IAS nih tum ruh tlat an tam tawh a, engtikah emaw chuan an la tling chur chur dawn nia a hmuh thu Mizoram Youth Commission chairman Dr Vanlaltanpuia MLA chuan a sawi.
Zirtawpnia Serchhipa Youth Centre a hawnnaah MYC chairman chuan Mizote hi theihna sang tak nei hnam kan ni a, tih tak zeta kan beihna lam apiangah sang tak kan thleng thei zel a, India ram sawrkar hna lian lakna UPSC exam lamah erawh kan dinhmun a la hniam tlat tih a sawi. “Kawng danga tha em em thalaite he kawnga kan hnufual tlat mai hian rilru a tihrehawm em em a. He mutan hi hneh tumin MYC chuan hma kan la ta a ni,” tiin, sawrkar sum pek hmangin IAS nih tumte tan ruahmanna an siam dan a sawi.
“Kan beisei thil, kan thlen tum hmun hi kan hnaih hret hret zel a. Tunah hian thalai tam tak IAS nih tum ruh tlat kan ngah tawh hle a, kawng dik kan zawh chhoh zel avangin engtikah emaw chuan kan la tling chur chur dawn niin ka hmu,” a ti. Kuminah ngei pawh hian Super IAS 2023 buatsaih leh tumin MYC chuan hma a la mek a, a zat bituk lawk loin theihna nei nia an hriatte chu an zaa Delhi a coaching kaltir an tum dawn tih Dr Vanlaltanpuia hian a sawi a ni.
Zirna lam chauh nilo eizawnna kawng dap a, thalaite tuaihriam chu MYC-in a tum a, chumi atan chuan Youth Centre hi an mamawh avangin Serchhipah pawh an hawng a, thalaiten thiamna leh hriatna an hmuhna hmunah chantir an tum dawn tih a sawi.
Serchhip Darnam Venga SEDP sum cheng nuai 300 senga sak Youth Centre building hi chhawng thuma sang niin, ground floor ah lirthei dahna hmun leh chowkidar room a awm a, first floor ah mikhual thlenna hmun tur mipa leh hmeichhe room hran khum 10 ve ve awm theihna, office leh meeting room, Knowledge Centre atana la hman tura duan te a awm. Second floor ah Main Hall (volleyball court ni nghal) leh store room a awm a ni. He building hian ruahtui khawlna tur litre 20000 leng tuizem a nei bawk.