2023 Club World Cup thlengtu tur Jeddah

Sum tamna Arab ramin khawvel football-ah bu an khuar nghet zel a, kumin Fifa Club World Cup thlengtu tur pawh khawi dang ni loin Cristiano Ronaldo, Lionel Messi leh Karim Benzema-te kalna Saudi Arabia ram khawpui Jeddah a nih thu Fifa chuan Thawhtanni khan a nemnghet leh tawh!
2023 Club World Cup thlengtu tur endiktu Fifa delegation team chuan karliamta khan Jeddah khawpui hi tlawhin, tournament thleng tura an inbuatsaih dante an endik a, thutlukna an siam fel ta a ni.
SAFF president Yasser Al Misehal chuan Fifa Club World Cup thleng tura international sports envent lian hrang hrang lo dawl tawh Jeddah an thlang chu phurawm a tih thu a sawi.
Khawmualpui tin club champion theuhte inelna he tournament hi kumin December 12-22 chhungin a vawikhatna atan Saudi Arabia ramah hian an khel dawn a; he khawpuia nghah tum a nih thu hi kumin February7 thla khan puang tawh mah se Fifa endiktu pawlin tournament thleng tura Saudi Arabia inbuatsaih dan an endik hnuah thutlukna tak tak an siam ta a ni.
Kumin Club World Cup hi tuna an khelh danphung pangngaia an khelh tawpna tur ni tawhin, kum 2025-a United States lamin a thlen hun atang chuan team 32 laiin an khel tawh dawn a ni.