Ruihhlovin min chim sâng ta hle….

Excise and Narcotics Department (END)-in kumin thla ruk chhunga ruihhlo heroin an manchhuah zat chu Kg 36 a tling ta. Chawhrualin thla tin heroin Kg 6 manchhuah ang a ni.
Kum nga kal ta, 2018-ah khan, kum khat chhungin heroin Kg 8.716 man chhuah a ni a, kha kha kum khat chhunga heroin Kg 8 man tlin vawikhatna a ni. Kum nga kaltaa kum khat chhunga heroin man chhuah zat ang thuak kha tunah chuan thla khat chhunga man chhuah zat a ni ta. END bakah hian CYMA hnuaia CADS leh Police-te pawhin heroin hi an man thin bawk a, chungte nen chuan thla khata heroin man chhuah zat hi a la tam zawk fe dawn tihna a ni.
Kumin July thla kan han chuangkai tan chauh a, July ni 2 zan khan END chuan Bawngkawn Sairang Road-ah heroin Kg 4.85 an han man leh pang mai a. Kum 2018 chhunga heroin manchhuah zatve aia tam zawk zankhat thil thuah man a ni leh ta der mai.
Heti zat heroin man chhuah tur a awm hi chuan, manchhuah loh pawh engemawzat awm tura ngaih a ni a; ruihhlo hluar chak dan leh, ruihhlovin kan ram a chim dan hi a ‘turu’ takzet tawh a. Hetih lai hian, kan thalaite zingah ruihhlo ngai an pung ve zel a, kumtling lo zingah pawh ruihhlo ngai an awm chho tan bawk. Ruihhlovin min chim dan hi a nasa tawh a, ralkhel dar khawn rik a hun takzet tawh a, a sawrkar, a kohhran, a pawl leh mimal ang pawha mutmawh hnarmawha neih tham a ni takzet tawh.
Ralthuam keng hel pawl awmlohna leh, silaia inrikrapna leh inkah rup rupna a awm lohna state ralmuang kan nihna hi chhuang taka kan sawi thin lai hian, thildanga ralmuanlohna chi hrang hrangin a ruka min nuai mek dan hi thlir liam mai chi a ni tawh lo. Ruihhlo ngaite enkawlna changkang tak nei tura hmalakna hi inchhuanna tur thil a ni lo a, ruihhlo ngai enkawl tur awm lohna emaw, ruihhlo ngai awm tlemna emaw state ni tura tanlakna lamah inchhuanna tham hmalakna neih theih a pawimawh. Ruihhlo tam tak tak manchhuah theih hi a tha, chutih rualin ruihhlo tam tak kan rama lo lut tur lo dan chah tuma beihpui thlak erawh kan tihmakmawh a ni.