Siami Vision

Asian Games 2026-a India tan hmeichhe hockey-a Gold Medal vaw chhuaktu, Lalremsiami Hmar Zote chuan, drugs leh zuk leh hmuam bawiha Mizo thalai tam tak an la táng chu pawi a tih thu leh rilru natthlak a tih thu a sawi a. Heti hian a sawi:
“Mizorama vawiin nia thlamuang tak leh nuam taka kan awm theih chhan leh Mizoram hi kan chhuan ve em em theih chhan chu, kan pi leh pu te, kan nu leh pate thawhrim rah kha a ni.”
“Ruihtheih thil, zuk leh hmuam laka thalaite kan fihlim loh chuan tun atanga kum 20-50 ah chuan Mizote hi kan tawlh hniam dawn.”
“|halai kan nih lai hian nakin hun atana kan ngaihtuahna te kan hman hi a pawimawh a, tun hun chauh ngaihtuah lova nakin hun thlenga Mizoram kan thlir thlen hi a pawimawh a, chu chu thalaite mawhphurhna a ni.”
“Kan ram kan hnam tan eng nge tangkai ve theihna kan neih tih hi kan inzawh a pawimawh.”
Heng thu te hi tunhnaia Be Lit podcast-a Mafeli Hlawndo-in a kawmnaa Siami sawi a ni a, “Siami Vision” tiin kan vuah ta a ni. A chhan chu, Siami hian hma lam hun thui tak a thlir a, ruihhlo bawiha táng mek a thalaipui tam tak an la awm tih a hriatin manganthlak a ti a, ‘tun hun chauh ngaihtuah lova nakin hun thlenga Mizoram kan thlir thlen hi a pawimawh’ tiin a thalaipuite a sawm lawm lawm a ni.
Siami Vision hian thalaite chauh a huap lo. Tuna kan Zotlang Ram Nuam kan tih mek hi “kan pi leh pu te, kan nu leh pate thawhrim rah” tiin a sawi a. Tuna nu leh pate hian kan tu leh fate, kan tuchhuan, chhuan hnih chhuan thum, chhuan tam tak lo la awm zel turte tan hian ram nuam kan hnutchhiah dawn em tih hi kan ngaihtuah a pawimawh hle tih a lang nghal bawk a ni.
Ram inrelbawlnaa mawhphurtu sâng ber, tuna mipuiin kan aiawha rorel tura kan thlan chhuah, ‘ram roreltu’ kan tih te hian eng vision nge an neih tih hi zawhna pawimawh tak a ni.
Kum 50 kal ta atanga tun hun thleng hi han bih chiang ila, ‘ei leh bara intodelh’ tih kha sorkar zawng zawng au-hla a ni a, mahse kan tun dinhmun hian ‘ei leh bara intodelh’ chu a la hlat hle tih kan hre tlang vek awm e. Chuti a nih si chuan, tun atanga kum 50 lo la awm leh turah chuan tuna ram hruaitute hi hmuh phakah an awm tawh kher lo ang a, mahse eng nge an hnutchhiah dawn tih chu zawhna pawimawh tak a ni.
A tawp berah chuan, Siami Vision hi Siami ta chauh a ni lo va, Mizo thalai zawng zawng ta, Mizo thalaiten an intawm vek a ni. |halaite khawvel a ni tawh alawm tiin ram kaihhruai hna pawh thalaite kuta dah duhna a lian chho mek a, chutih rualin, ram kaihhruai hna hi tun hun atan chauh ni lo, nakin hun khawvel lo la awm zel tur thlir tel chunga thawh tur a ni tih hi kan hriat thar a hun takzet a ni.
Siami chuan ram tan Gold Medal a vaw chhuak a, tuna ram hruaitute hian eng medal nge an vuak chhuah ve dawn? Siami Vision hi ram hruaitute tan chona lian tak a ni.