India-ah ruah sur vangin buai

India hmar lam ram te chu fur ruahtui tla hmasa avangin harsatna an tawk mek a ni. Heng zingah hian New Delhi, Uttarakhand, Himachal Pradesh leh Jammu & Kashmir te chu ruah sur nasat na hmun te an ni a, Indian Meteorological Department (IMD) in Thawhlehnia a sawi danin Uttarakhand state a district hrang hrang te chu Red zone” te “Orange zone” te tiin darkar 24 chhung atan ralkhel dar te a siam hial a ni.
Delhi khawpui chhunga luang Yamuna lui phei chuan hlauhawm chhinchhiahna 206 meters in a pel tawh a, Thawhlehni khan he luipui kianga mihring chengte chu hmun him zawka suan chhuah an ni tawh hial a, luipui hian beisei aia hma in hlauhawm chhinchhiahna hi a rawn pel niin IMD Scientist te chuan an sawi.
He monsoon ruah sur avang hian sakhaw hmun thianghlim tlawh tur te pawh an tal buai hle mai a, Jammu-Srinagar National Highway siam that nghaka ni thum zet mai Jammu base camp a tangkhang tawh chu Thawhlehni tlai lam hian Amarnath Yatra an chhunzawm leh thei dawn choh a ni. Hmun thianghlim Amarnath Cave tlawh tura kal pawl pakhat phei chuan ruah sur avanga hmun hrang hranga kawngpui chhia in a dan avangin Kashmir lama kal an phal sak hial a ni.