US President chu Plastic Surgery hmanga puh a ni

US President Joe Biden chuan a term hnihna atana President chuh tuma a inbuatsaih mek laiin beihna a tawk leh ta a. Republican atanga congressman leh doctor ni bawk Greg Murphy chuan President Joe Biden chu hmai chuar tur laka inven nan damdawi hmanga a inchiu nasat thu a rawn au chhuah pui ve leh ta. US President hriselna chungchang an sawina ah North Carolina aiawha congress member leh zun kawng lam zai thiam doctor ni bawk, East Carolina University School of Medicine a mi Greg Murphy chuan Joe Biden chuan hmai leh vun chuar venna injection leh plastic surgery a hman nasat thu a rawn sawi chhuak a ni. Biden chuan a vawi hnih nana president chuh leh a tum thu a au puan hnu in a hriselna chungchang ah zawhna chi hrang hrang a dawng tam em em a. Joe Biden hi President a thlan nawn a nih leh a a term a hman zawh meuh chuan kum 86 mi niin US President ah chuan upa ber nihna a hauh thei dawn a ni.
Joe biden chuan a hriselna chungchangah zawhna tamtak dawng mahse a taksa leh rilru te chu a la hrisel tha in hnathawk thei tura a rilru pawh a la fit thu a sawi ve thung a. Biden chuan, “Tuna ka kum zat ngaihtuaha ka upat ang hian ka in ngai upa lova, tho thlawk thei ang mai hian ka inngai zawk a ni. Tun dinhmun ah hian ka taksa emaw ka rilru emaw eng thil pawh nise tunhma lama ka tih theih ang tih theih loh ka la neilo a ni” tiin a lo sawi tawh a ni.
Hetihlai hian Greg Murphy chuan Fox News hnenah, “Joe hi en ang u hmiang. Plastic Surgery te, hmai chuar venna damdawi a injection te leh vun chuar venna damdawi a injection te hi a hmang nasa em em a. Hetiang mi kum upa lam hi damdawiin ah nasa takin ka lo enkawl fo tawh thin a, a kum telin an ngaihtuahna fim te hi a tlahniam rawk rawk thin. hei hi thu dik niin Joe Biden a chungah pawh a thleng mek a ni” tiin a sawi ve bawk.