Shawn Carter Foundation-in $20M an tuak ngah

2003-a Jay-Z leh a nu Gloria Carter ten an din Shawn Carter Foundation chuan New York City-ah Zirtawpni kalta khan black-tie gala neiin, zirna lama sum leh paia harsatna tawk te chhawmdawlna turin dollar maktaduai 20 an tuak ngah thei.
He fundraising-ah hian Jeff Bezos leh Lauren Sanchez ten dollar maktaduai 10 thawhin, Jack Dorsey pawhin dollar maktaduai 2 a thawh a, mi hrang hrangin an thawh khawm nen zan khat thil thuah dollar maktaduai 20 hi an tuak ngah nghal der mai a ni.
Zirtawpni zan black-tie gala hi The Shawn Carter Foundation kum 20 tlin champha lawmna a ni nghal a, rimawi, infiamna, sumdawnna leh entertainment lama mi langsar tak tak an tel a, chung zingah chuan Jay-Z nupui Beyonce, DJ Khaled, Lil Uzi Vert, Meek Mill, Babyface, Miguel, Tinashe, ASAP Ferg leh Saint Jhn, New England Patriots neitu Robert Kraft, NFL commissioner Roger Goodell, Regina Hall, Chass Palminteri, Robinson Cano, Zane Lowe te an tel.
The Shawn Carter Foundation hian thalai sum leh pai lam harsatna avanga zirna chhunzawm thei lo te tan college scholarship leh ram danga zir theihna tur kawng an hawn sak thin a ni.