Hmarchhak huap Zoawi Kut- July 27 & 28-ah

Mizo Zaimi Inzawmkhawm (MZI) leh Art & Culture Deptt. tangkawpin an buatsaih Zoawi Kut chu July ni 27-28 hian Dawrpui Multipurpose Centre-ah neih a ni dawn a, NE States hrang hrang atanga zai tur mimal leh band te bakah NE States hrang hrang cultural troupe an tel dawn a ni.
Zoawi Kut hi July ni 27, 2023, chawhnu dar 2-ah Chief Minister Zoramthanga’n a hawng dawn a, zan dar 9 thlengin NE States hrang hranga mimal zaithiam leh band tha te bakah hnam lam chi hrang hrang te nen hun hman a ni ang a, kut hman chhungin a hmunah ei leh in chi hrang hrang zawrhna food stall a awm dawn a, thil dang chi hrang hrang zawrhna stall a awm dawn bawk.
July ni 28-ah Art & Culture Minister R Lalzirliana’n a telpui ve thung ang a, Mizoram leh state dang atanga zaithiam te leh hnam lam te entir a ni ang a, zan lamah Kut khar a ni ang.
Zoawi Kut hi Zonet leh LPS bakah AIR, Aizawl station atanga live-a pekchhuah tura ruahman a ni a. A hmuna chhim turin a buatsaihtute chuan mi zawng zawng an sawm bawk.