Satwik-a’n batminton vaw na record siam

Satwik-a’n batminton vaw na record siam
Indian badminton khelthiam hriathlawh tak Satwiksairaj Rankireddy chuan Guinness World Record a siam a, a record siam chu badminton smash na ber a ni. Satwik hian 565 kmph a chakin shuttle cock a smash a, hei hi record thar a ni ta a ni.
A hmaa hetiang record chu Malaysian Tan Boon Heong-a’n May 2013-a a siam niin, 493 kmph a nain a smash a, he record hi Satwik hian a rawn khum ta a ni. Hmeichhe lamah chuan Malaysian Tan Pearly chu smash na ber record siamtu niin, 438 kmph a nain a smash thei.
Japanese sports bungraw siamtu hriathlawh tak Yonex chuan thuchhuah siamin, “Yonex badminton athlete Satwiksairaj Rankireddy (IND) leh Tan Pearly (MAS) te chuan mipa leh hmeichhia a badminton vaw na ber record an siam tih chhuang takin kan puang e. A hmaa Guinness World Record chu May 2013 a siam daih tawh kha a nih avangin Rankireddy hian kum 10 lai record ding tawh a rawn khum ta a ni,” an ti.
He record hi April ni 14, 2023-a a siam niin, Guinness World Record official judge ten an endik hnuah record a an pawm thu an puang ta a ni. Satwik record siamna hi Yonex factory gymnasium Soka, Saitama, Japan-ah a ni.