Khawvel chu ‘dinhmun chhe tak’ ah harsatna hrang hrang inthlunzawmte climate change leh Russia-in Ukraine a run te avanga awm mekin car insu buai nuai nuai ang mai dinhmunah a ding mek a ni, tiin UN chief chuan World Economic Forum meeting neihnaah a sawi.
-- Advertisement --
UN Secretary-General Antonio Guterres chuan world leader te inhmuhkhawmna Swiss ski resort Davos a neiha thusawina a nei a. Hetih lai hian Ukraine-a helicopter chesual avangin mi 18-in nunna chanin Ukraine interior minister chu nunna chan zingah a tel a.
Forum president Borge Brende chuan second 15 ngawi renga sunna hun hman rawtin Ukrainian first lady Olena Zelenska phei chu a mittui tla in ‘lungngaih ni a ni’ tia sawiin ‘He dinhmun chhe em em hi kan thlak danglam thei asin’ a ti zui bawk.
A nupuiin Ukraine tana tanpuina sum tam zawk a ngiat laiin Ukrainian President Volodymyr Zelensky chuan video link hmangin thusawina a nei dawn bawk a.
German Chancellor Olaf Scholz chuan geopolitical division leh inrintawnlohna chuan khawvelin harsatna a tawh te chinfelna kawngah harsatna nasa tak a siam tia sawiin intluktlanlohna a zau zel a, inflation sang zual zelin energy lamah harsatna a awm a, Covid-19 pandemic avanga supply-chain buai pawh a la pangngai lova cost-of-living crisis a thleng mek a ni, a ti bawk.
Climate change chu mihring tena harsatna an tawh nasat ber ni mek tia sawiin khawvelin kan chenna lei temperature sang zel 1.50degree Celcius aia sang lo va dah tuma hmalakna chu a thuanawp lek lek reng a ti bawk.
Guterres chuan, “Kar kalta lawk khan fossil fuel producer ten kum 1970 chho daih tawhah khan an thil tharchhuah chuan kan chenna lei a tichhe dawn tih an hre lawk tawh a ni,” tia sawiin, “Oil company lian ten dawt an sawi a ni,” tiin a sawi bawk.
Davos inhmuhkhawmna hi ni li awh tur niin politician, CEO leh hruaitu lawk dang ten khawvel harsatna an sawiho dawn a, thutlukna siamin mahse bawhzui dan a tha tawk thin lo. Environmentalist te chuan carbon pechhuak nasa private jet hmangin climate change chung chang sawihonaah hruaitu lawk te an kal a ni tiin an sawisel thung.
Davos meeting neihnaah hian Ukraine chuan a lailum luah zelin Zelensky chuan Russia laka an him nana tanpina tam zawk pe tura ngenin naupang an thi a, ei leh bar lamah harsatna kan tawk a ni a ti bawk.
Hetih lai hian Dutch Prime Minister Mark Rutte chuan Netherlands chuan US leh Germany te thlawpin Ukraine hnenah Patrior defence system a pe dawn tiin a puang thung.