France President Emmanuel Macron-an reform siam tuma pension kum tihsan a tumna chu dodalin duhlohna lantirna nasa tak neih a ni.
He bill thar hian parliament a paltlang a la ngai a, pawm a nih chuan pension kum 62 atangin 64 ah tihsan a ni ang.
-- Advertisement --
Intercity leh commuter train te chu lungawilohna lantirna avang hian a mumal lo va. School leh public service dangte pawh khar a ni bawk.
Paris khawpuiah leh khawpui dang dangah mi sang tam tak te pungkhawmin ultra-left ‘black bloc’ infiltrator te an zingah an inphumruk hlauhna a lian hle a ni.
Tun thla tir lama Prime Minister Elisabeth Borne in ruahmanna a siam a tarlanah kum 2027 atang chuan hnathawktuin full pension a neih theih nan kum 43 hna a thawh a ngai tawh dawn bawk a, tuna hman mek chu kum 42 a ni.
Sorkar erawhin France pension system humhim nana hmalakna a ti thung a, mipui ngaihdan erawh ni lo hle a, IFOP poll lakah 68% ten an duh lo a ni.
France rama union tin te chuan an dodal a, sorkar hmalakna chu sawiselin National Assembly ah pawh left-wing leh far-right te pawhin an dodal bawk a.
“Elysee palace lung bang te hi a nghin a ngai” tiin Communist Party leader Fabien Roussel chuan a sawi a. A chhan chu an Renaissance party chuan Assembly ah majority an nei bawk si lo. French President Macron chuan a ruahmanna kaltlangpui tur chuan conservative Republicans party MP 60 velte thlawona a mamawh dawn a ni.
Parliament-ah hian chuti maia pawm a ni mai thei dawn lo va, kar eng emaw zah a awh ngei a ngai dawn a, chutih laiin sorkar ruahmanna duh lohna lantirna chu a nasa tial tial thung a ni.
Prime Minister chuan ruahmanna thar an siam chu ‘inter-generational solidarity’ principle hmanga an kalpui tia sawiin mipui te hna an thawh rei deuh chu a ngai a ti a. French system hman mekah mi tlem te chauhin capital investment nena inzawm pension plan an nei a.
Pension tawh te chhawmdawl zelna chu common fund tih mai hnathawk mek tena thla tina contribution an pek hmanga pek an ni a. Hnathawk mek te pawhin an chawlh hunah chutiang thova chhawmdawlin an awm dawn tih an hria a ni.
Sorkar chuan he system hian chhiatrup a hnaih tia sawiin a chhan ber pawh hnathawk mek leh chawl tawhte ratio chu a tlahniam chak lutuk an ti a. Kum 50 kaltaa pension tawhah la thawk mek mi pali zel an awm laiin a ratio hi tunah chuan pathumah 1.7 ah a tlahniam tawh a, a hniam zual zel dawn an ti bawk thung.
European ram tam tak chuan retirement age hi an tisang vek tawh a. Italy leh Germany-ah chuan kum 67 a ni a, Spain-ah chuan kum 65 a ni thung a, UK-ah chuan 66 a ni mek a ni.