USA in bul an tan tha
Australia leh New Zealand-a hmeichhe World Cup khel mekah champion lai USA in bul an tan tha a, an khelh hmasak bera an khingpui Vietnam chu si thum faiin an hneh nghal. USA rual hian Japan leh England ten hnehna an chang ve bawk.
Vawi hnih champion zawn tawh USA hian Vietnam lakah tha takin bul an tan a, minute 14-na lekah Sophia Smith chuan hmahruaina goal a thun nghal. Goal hmahruai thuntu Smith hian minute 45+7-ah an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah USA nula te an khel tha chhunzawm zel a, goal thun tur khawpin Vietnam in an nawr tlang thei meuh lo. Game thunun hneh tak USA hian goal an thun belh leh a, minute 77-naah Lindsey Horan chuan an goal thumna thunin a tawp a khar. Asian team Vietnam lakah si thum faia chak champion lai hian point thum hmuin Group E-ah hma an hruai nghal.
USA in si thum faia hnehna an chan lai hian khaw chak ral lian Japan chuan si nga fai ngawtin an khingpui Zambia an hneh ve thung a, Group A hma-hruaitu an ni nghal.
Japan hian Zambia lakah khel tha viau mah se goal an thun thei lawk bik lo. Chawlhlawk dawn hnaih minute 43-naah Hinata Miyazawa chuan an hmahruaina goal a thun chauh a, si khat faia hmahruai chungin chawlhlawk an hmang.
Chawlhlawk hnu lamah tha zual zawkin an inlan a, minute 55-naah Mina Tanaka chuan an goal hnihna a thun a, goal hmahruai thuntu Miyazawa chuan minute 62-naah an goal thumna a thun zui leh bawk. Si thum faia hma an hruai hnuin Jun Endo leh Riko Ueki ten goal an thun belh leh bawk. Hun tawp dawn hnaihah Zambia player Catherine Musonda hnawhchhuah a ni ve thung.
Champion tura rinkai zinga mi England chuan Inrinni zan khan Haiti hmachhawnin bul an tan a, minute 29-naah Georgia Stanway penalty pet goal hmangin hnehna an chang thei hram chauh a, beisei phak lo takin bul an tan. Hati lakah si khat faia chak hram England hi Group D-ah pahnihna an ni rih a, an chungah si khat faia China hnehtu Denmark an awm.
Denmark pawh hi China lakah an khel tha bik lo viau a, an goal neih chhun hi minute 89-naah Amalie Vangsgaard thun a ni.