Chanmari FC in final an lut

Thawhtan zan khan Star Cement MPL 13 semi-final thawh hnihna khelh a ni a. Thawhkhatnaa tlawm tawh Chanmari FC in Ramthar Veng FC chu 3-0 ngawtin an hneh let a, final an lut. CFC hian Mizoram Police FC leh Dinthar FC te inkhela chak zawk zawk an hmachhawn ang.
Champion tura rinkai ber Chanmari FC hian semi-final thawhkhatnaah beisei an phak lova, MPL club thar Ramthar Veng FC lakah 2-1 in an tlawm. Aizawl FC awm loh vanga semi-final khel Ramthar Veng FC lehthal ngei tuma thapui an thawh a, an phu ang ngeiin hnehna an chang.
Final luh ngei tuma tan khawh Chanmari FC hian RVFC lakah duhthusama thain bul an tan a, inkhel tan atanga minute khatna lekah Lalthanzuala (TZ-a) hmangin hmahruaina goal an thun nghal.
Hma takah goal an thun vangin an phur a, inrintawkna sang zawk nen an khingpuite an hmachhawn. Goal an thun hma em vanga Chanmari FC an phur em em laiin MPL an hmachhawn hmasak bera final luh nghal tum Ramthar Veng FC an talbuai ve thung. An khingpuite an buai zual laiin chuhin CFC in na takin an khingpuite an nawr chhunzawm a. Hmahruaina goal an thun atanga minute nga hnu lekah goal hmahruai thuntu TZ-a chuan an goal hnihna a thun belh zui leh zat a, an hmahruaina a tizau.
Si hniha hmahruai tawh CFC hian an khingpuite an nawr zui char char a, chawlhlawk dawn hnaih minute 37-naah Mesak C Lalrinngheta chuan an goal thumna a thun a, an hmahruaina a tizau leh zual. CFC goal thumna thuntu Mesak-a hi Player of the match ah thlan zui a ni.
Minute 37 chhunga goal thum lut bak hi hun tawp thlengin a luh belh thei lova CFC in si belhkhawmah 5-2 in RVFC an hneh a, MPL 13 final an inhlangkai.