Billboard 200-ah ‘Speak Now (Taylor’s Version)’ a la No.1

Taylor Swift-i’n a album hlui a record thar leh pathumna ‘Speak Now (Taylor’s Version)’ chu Billboard 200 (albums) chart-ah a No.1 a, he chart-a a zawna kar hnih a No.1-na a ni ta a, a album hlui a record thar leh zingah chart-a kar khat aia rei No.1 thei awm chhun a la ni. Swift hian a album hlui ‘Fearless’ leh ‘Red’ te pawh a re-record version tlangzarh tawhin chart No.1-ah kar khat ve ve an lo awm tawh bawk a ni.
Billboard 200 hi kar khat chhunga US-a zaithiam te album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘Speak Now (Taylor’s Version)’ hi a kar hnihnaah US-ah 1,21,000 hralh lehin, chung zinga 73,000 chu streaming atanga album hralhna tlukpui (on-demand official stream maktaduai 95.5) niin, album tak tak hralh zat chu 47,000 a ni a, album a hla mal hralhna atangin 1,000 a tling thei bawk.
Tunkar chart top 10-ah album tlangzarh thar lang a awm lo a, tun thla ruk chhunga hetiang a chart top 10-a album thar a lan miah loh vawi khatna a ni. Hetihrual hian Taylor Swift hian tunkar chart top 10-a lang thei album pali a nei a, kar kalta khan hetiang zat chiah hi a lo nei tawh bawk a, zaithiam damlai zingah tum khata chart ranking top 10-a album pali chin nei thei awm chhun a la ni.
Chart No.1 hlui Morgan Wallen ‘One Thing at a Time’ chu 1,05,000 hralh lehin No.2-ah bawk a la awm a, he album hi kar 20 chhung chu kar tin 1,00,000 an la hralh tling ziah a, hetiang zat hralh theih album awm chhun a la ni.
Peso Pluma ‘Genesis’ chu 55,000 hralh lehin No.4 atangin No.3-ah a insawn thar leh a, chart No.1 hlui Taylor Swift ‘Midnights’ chu 51,000 hralh lehin No.5 atangin No.4 a kai thar leh ta a, Morgan Wallen album dang, chart No.1 pawh lo ni tawh ‘Dangerous: The Double Album’ chu 48,000 hralh lehin No.6 atangin No.5 a kai thar ve leh ta bawk.
Chart No.1 hlui bawk Taylor Swift ‘Lover’ chu 44,000 hralh lehin No.7 atangin No.6-ah a insawn leh ta a, chart No.1 hlui tho SZA ‘SOS’ chu 43,000 hralh lehin No.8 atangin No.7 a kai thar leh a, chart No.1 hlui bawk Lil Uzi Vert ‘Pink Tape’ chu 40,000 hralh lehin No.3 atangin No.8-ah a tawlh a, Gunna ;A Gift & a Curse’ chu 40,000 tling lo deuh hralh lehin No.9-ah bawk a la awm a, chart No.1 hlui Taylor Swift ‘Folklore’ chu 34,000 hralh lehin No.10-ah bawk a la awm.