Nashville Songwriters Hall of Fame-ah Taylor Swift an la lut ta

Nashville Songwriters Hall of Fame-ah Taylor Swift an la lut ta
An rama Thawhtanni zan (keini tan Thawhlehni tuk a ni hman tawh) khan Taylor Swift chu Nashville Songwriters Hall of Fame-ah lak luh a ni ta a, Swift hi he hall of fame-a lak luh zinga naupang ber a la ni. Swift bakah kumin hian Lyle Lovett, Shawn Camp, Lee Thomas Miller, Bruce Channel leh chatuan ram pan tawh J.I. Allison te lak luh an ni.
56th annual gala, Nashville Music City Center-a neihah Grammy award 14 dawng tawh Taylor Swift lak luhna hi Brad Paisley-a’n neiin, Swift hian 2007-a Brad Paisley-a’n a prank chungchang sawi chhuakin, “Heta ka hmu thut che hian min barakhaih hle mai, 2007 atang khan kan intihtauhsan tawh kha a ni sia,” a ti.
Brad hian Swift tour bus chhungah khau a lo dah teuh a niawm a, Swift chuan, “A thla a thla ka mut theih loh phah a. Khauchher chiri riin min tiharh zankhua thak zel alawm,” a ti a, mahse, tuna Brad-a’n a introduction chu hun kal tawhte theihnghilh phahna tur khawp a mawihnai a nih thu a sawi bawk.
Swift chuan country music chu a bul tanna leh a inchher hriamna a nih thu te sawiin, hlaphuah kawnga hma a sawnna leh a rimawi career atan Nashville chu hmun pawimawh a nih thu sawiin, “Htiang music community ang hi music community dang a awm reng reng lo. Ka hria alawm, community hrang hrang ka luhchilh tawh a,” tiin country music community chungchang a sawi bawk.