Thlavang hauh…

Mizoten ‘thlavang hauh’ tih te, ‘thla hual’ tihte hi kan nei a. ‘Thlavang hauh’ chu, lainate thangtlawm theihna tur laka ven leh tan hi a ni a. ‘Thla hual’ chu, mi thlabar taka an awmin an thlabarna laka thlamuan tura ran talh hi a ni.
NGO Coordination Committee huaihawtin vawiinah Manipur-a Zo hnahthlak unaute thlavang hauhna kawngzawh Mizoramah neih a ni dawn a. Ruahmanna atanga a lan danah chuan he kawngzawh hi ‘a khawnawtin’ tih ang kha a ni.
Manipur-a kan Zo hnahthlak unaute tawrhna rapthlak tak hi tu te pawhin kan hriain kan hmu a, kan lainatin kan thin a rim em em vek a. A nihna takah chuan, ‘heti hrim hrim chu, kan nih nih kan ni mai ang chu…’ tia chempui nena kawh chhuah ve mai duhna thinlung pu kan ni hlawm ang tih a rinawm. Chutih laiin, kan mi hmasa, mi huaisen kal tate ral rel dan kan hria a, pasaltha huaisen Chawngbawla, ‘a hun leh a hmun’ azira ral beih dan thiam entawn tur kan nei tih kan hriat reng a pawimawh hle awm e.
Thlavang hauh hming pua kawngzawh kan nih dawn takah chuan, lungawilohna leh thinrimna lantir nana thuziak keng chung leh, au rual chunga kawng zawh mup mup ringawt hi ‘thlavang hauh’ awmzia a ni tluantling lo tih kan hriat erawh a pawimawh dawn. Kan rilru leh duh dan lantirna kawngzawh tuna huaihawt hi ‘thlavang hauh’ rahka bultanna (first step) a ni a, a dawtah rahka dang kan zawhpui zui zel a pawimawh tulh tulh dawn.
Kan lainate kan tan a, an dinhmun chhiat theihna laka ven kan duh chuan, kan lo au a, a tih dan tur kan lo hrilh a, thahnem ngaih luatah kut te lo vaiin kan lo phar kual a, a chang chuan kan lo va ban ve zuau zuau thin a nih hi. Kan unaute thlavang hauh tur chuan an tlu tur kan lo dawm a, kan lo tun din a, a theih ang anga tha kan lo thawhpuite pawh a ngai thin. State dang atanga tharum thawh chunga zuan luh ve ngawt hi ‘thlavang hauhna’ tha ber a ni dawn lo a; chutianga chet lak chu ‘meiling chhem’ ang mai a ni thei a; thahnem ngaih luatah a chhe zawk a thleng thei. Hetiang hunah hian Val Upa (NGO Coordination Committee leh sawrkar) thu ngaihchan a finthlak ang.
Kan unaute dinhmun chhe tur dawmkanpui tur chuan, sawrkar laipuiah te a tul ang anga thu thlen a, hmai sen nena awr phiar tawng tawng khawpa awrawl chhuah a tul pawha chhuah ve mai tura kan inbuatsaih sauh sauh a pawimawh khawp ang le.