Hmeichhe rilru

Hmeichhia leh mipa chu kan pianzia atanga renga inang lo kan nih vangin kan rilru puthmang pawh a hrang daih a, kan thil sawi dan leh kan duhzawng tihlan thin dan te pawh a inang lo thei hle a ni.
Hmeichhia ten mipa an sawiselna tam ber chu, ‘Hmeichhia te min hrethiam tak tak lo!” tih a ni thin. A dik reng a ni, mipa tam takin hmeichhia chu hriatthiam kan tum lova, hriatthiam theih loh turah kan ngai te pawh a ni mahna. Mahse, hmeichhia chu chuti taka hriatthiam harsa an lo ni bik love.
Mipain kan hriatthiam loh langsar tak pakhat chu, hmeichhia chuan tlang takin an rilru te mipa hnenah tawngkain an hrilh nghal ngawt ngai lo. Hmeichhia chu an sensitive zawk a, an emotional zawk bawk. Entir nan, hmeichhia chuan, “Kha lai bawlhhlawh kha i hman hunah i lo paih lawk thei ang em?” a ti a. A tawngkam hman atang chuan mipain a ngaipawimawh tawk lova, a theihnghilh leh ta mai. Mahse, khatih laia hmeichhe rilru tak zawk chu, “Bawlhhlawh kha paih nghal vat teh” tih a ni daih zawk. Mahse, chutiang tawngkam chu a hmeichhia lo tlat!
Hmeichhiain ‘Maithei” an tih chuan “Aih” an tihna nen a thuhmun deuh thaw niin an sawi. Hmeichhia chu lenchhuah puiah i sawm a, “Ka hman dawn leh dawn lo ka hre mai lo, tih tur a awm em ka lo chian phawt ang e,” a tih chuan, a rilruah chuan “Chuti maia awlsam a sawm chhuah mai mai theih ka ni hleinem,” tihna te pawh a ni thei. Hmeichhia te hi zawng mipa aiin an polite deuh zawk a ni!
Hmeichhia chuan an taksa chetziain an rilru te an lan tir nasa a, a mipa duhzawng tak a hmuh pawhin tawngka hrilh mai lovin a taksa chetziain a tilang hmasa phawt ang- entir nan, a duhzawng mit leh a mit a intawn tir chat chat ang, engtin emaw a taksa a tawk/nawk fuh palh ang, a sam emaw a nghawng vel emaw a khawih deuh sek ang.
Chutah mipa tana buaithlak leh angreng deuh chu, mipain an duh ni a an hriat hian hmeichhe thenkhat chu an khirh leh ta sawt thin a. A awmzia chu, thawkleh khatah rawn pan che a, an in-a leng tura rawn sawm nghal ngawt tur chein beisei suh.
Mipa tam zawk chuan an hmeichhe duhzawng thusawi apiang an pawm nghal thluam thluam zel ang. Mahse, a thusawi i lo tawngpawng ‘yes’ nghal ngawt loh khan hmeichhia chuan i rilru tak tak sawiah a ngai leh hlauh zawk thei tlat che a ni. Hmeichhia te chuan mipa te chu an bulah inphawrh vek lova, eng emaw zep then nei turah an ngai a, chuvangin anni pawh an fimkhur ru riau thin a ni.
Mipa ten hmeichhe rilru kan hriat thiam theih lohna chhan pakhat chu mipa thlirna atanga kan thlir thin vang a ni. Hmeichhe dinhmuna kan indah thiam thin loh vang mai a ni. Entir nan- pheikhawk keartui sang bun chunga thui tak kal a harsat dan tur pawh nangma bun anga i suangtuah thiam hmasak loh chuan a hrehawm dan tur tak tak i hre thiam dawn si lo!