City leh Spurs an chak, United an tlawm

Season thar atan inbuatsaihna neih meka club friendly match-ah Manchester City chuan Bayern Munich an hneh. City in German champion an hneh lai hian Manchester United chu second division team Wrexham lakah an tlawm ve thung.
English Premier League champion Manchester City leh German Bundesliga-a hi Japan khawpui Tokyo-a New Japan National Stadium-ah an inhmachhawn a, inkhel hmuhnawm takah EPL champion City in hnehna an chang.
Inkhel ngaihven hlawh takah Europe-a team lian pahnihte an innawr tawk viau a, chak tur zawk rin thiam pawh a har viau. Inkhel a rei tulh tulh a City an khel tha tulh tulh a, goal hnih thun zawkah an tang ta nghe nghe. City tan hian minute 21-naah James McAtee chuan hmahruaina goal a thun. He goal hmang hian si khat faia hmahruai chungin chawlhlawk an hmang.
Chawlhlawk hnu lamah inkhel a hmuh-nawm zui zel a, team hnihte an inngam tawk hle. Goal thun thei an awm lawk loh hnuin hun tawp dawn hnaihah goal hnih a lut. Minute 81-naah Mathys Tel chuan Bayern Munich tan goal thunin an si phurh a sut. Minute 81-naah an Bayern in goal an thun vangin an inhnehtawk zui mai a rinawm hman viau. An inhnehtawk thar leh hnuin City in goal thun ngei tumin tan an khawh thar leh a, minute 86-naah defender Aymeric Laporte chuan hma an hruai nawn lehna goal a thun a, he goal hi an chakpui zui ta a ni. City manager Pep Guardiola chuan a club hlui Bayern Munich lakah hnehna a chang a, inbuatsaihna hun tha takin an hmang.
United an tlawm
Japan lamah City in hnehna an chan laiin Manchester United chuan USA-ah Wrexham an hmachhawn ve thung a, an rawl thar team ten second division team an hneh lova, an mualpho.
Wales rama football club upa ber leh khawvela club upat lama pathumna hial ni phak Wrexham hian EPL team lian Manchester United lakah rin phak bakin bul an tan tha a, minute 29-naa Elliott Lee goal thun hmangin hma an hruai. Hmahruaina goal an thun hnuin Aaron Hayden chuan minute 36-naah an goal hnihna a thun zui leh a. United an barakhaih nawn leh ngat.
Si hnih ngawta an mualpho hnuin United rawlthar rualte hian goal thun tumin tan an khawh zui chiam a, chawlhlawk dawn hnaihah goal an thawkchhuak ta nge nge. Minute 45+6-ah Marc Jurado chuan goal thunin an si phurh a sut then.
Chawlhawlh hnu lamah goal tam zawk thunin, an khingpuite lehthal tum viau mah se chhe takin bul an tan nawn leh. Minute 47-na lekah Daniel Gore hnawhchhuah a ni a, Erik ten Hag-a team hi kim lo zawka an inlan chhunzawm a ngai. Tam zawk an nih hnuin Wrexham hian United an ngam leh zual a, minite 69-naah Sam Dalby chuan an goal thumna thunin an hmahruaina a ti zau. Minute 69-naa goal a luh hnu hian goal dang a luh belh thei tawh lova, Wrexham chuan 3-1 in club lian Manchester United an hneh a, hun chhinchhiahtlak an tawng.
Real Madrid hmachhawn zui leh mai tur an nih vangin United manager Erik ten Hag chuan Wrexham lakah an senior player a chhawr duh lova, a hahdamtir. Club lian zawk Real Madrid lakah hnehna changin, an mualphona thup thawi dam an tum ang.
Manchester United an hneh vangin lawm viau mah se Wrexham player pawimawh Paul Mullin chuan hliam na tak a tuar. Mullin hi zawnchhuah a nih hnuin hmanhmawh takin damdawi in panpui a ni a, oxygen pek nghal a ni. Mullin hliam hian an boruak a thlak danglam nasa hle.
Spurs an chak
London club lian Tottenham Hotspur chuan Singapore Stadium-ah Lion City Sailors an hmachhawn a, 5 – 1 in hnehna an chang.
Tottenham hian Singapore club lian Lion City Sailors lakah bul an tan tha lova, goal chhuah hmasa zawkah an tang. Minute 14-naah Singapore club tan hian Shawal Anuar chuan hmahruaina goal a thun. Minute 14-na leka goal an chhuah hi chawlhlawk dawn hnaih minute 45+4-ah Harry Kane penalty pet goal hmangin an sut thei hram a, 1-1 a inhnehtawk chungin chawlhlawk an hmang.
Chawlhlawk hmain khel chhe viau mah se chawlhlawk hnu lamah Spurs an khel tha ta viau thung a, goal li an thun. Richarlison chuan minute48′, 52 leh 90’+1-ahte goal thunin hattrick a siam a. Giovani Lo Celso chuan minute 73-naah goal a thun bawk a, an khingpuite hi 5-1 in an lehthal zui ta a ni.