Team lian chak loh laia Chak Arsenal
Inrinni zan khan English Premier League (EPL) khelh chhunzawm a ni a, tam lian; Liverpool, Chelsea leh Tottenham te an chak zawh loh laiin Arsenal in hnehna an chang. Season thara la chak vek Arsenal hian Manchester City lehpelin table chung ber an luah lailawk.
Guimareas a inlar
Season thara la chak vek Arsenal hi Sunderland hmachhawn turin Stadium of Light ah an lenglut. Mikhual an nihna hmunah bul an tan tha thawkhata Kai Havertz chuan hlauhawm taka petin goal a thun teuh hle. Havertz volley tha tak hi si nghak Robin Roefs chuan pui zetin a lo danga an team a chhanhim. Inkhel hmuhnawm takah hian chawlhlawk hmain goal lut a awm thei lo phawt.
Chawlhlawk hnu lamah Arsenal in bul an tan tha lova, goal an chhuah hmasa teuh hle. Second half tir lamah Arsenal defender Ezri Konsa chuan penalty a chawi. Sunderland tan Enzo Lee Fee penalty pet chu Gunners si nghak David Raya chuan pui zetin a dang a, an team a chhanhim. Penalty an thelh hnu lawkah Sunderland an che fuh lo zui a, goal an chhuah. Arsenal tan hian nipui bazar laia an lak luh Bruno Guimaraes chuan minute 58-naah pui zetin a pet lut a, hmahruaina goal a thun.
Newcastle United atanga Arsenal zawm Guimaraes hi Arsenal a zawm hnu lawkah a inhliam a, a club thar ta bul a la tan thei lo. Sunderland lakah pawh bul tan lo mah se mualchhung a luh hnuin a khel tha viau a, goal pawimawh tak thunin a team thar hma a hruai pui.
Goal an chhuah hnuin mualneitu Sunderland in an si phurh sut ngei tumin tan an khawh a, Arsenal an nawr buai thei hle. Inkhel hmuhnawm leh inkhel hautak takah goal a luh belh theih loh reng hnuin hun tawp dawn hnaihah Arsenal an vannei nawn leha penalty an hmu. Hun pek belh tawp dawn hnaihah Reinildo Mandava chuan box chhungah Bukayo Saka a pawt thlu a, penalty a chawi bakah hnawhchhuah a ni tel bawk. Bukayo Saka chuan a hlawhchhuah penalty chu minute 90+7-ah a pet goal a, an goal hnihna thunin an hmahruaina a tizau leh zual.
Saka goal thun hnuin goal dang a luh belh thei tawh lova, Arsenal chuan inkhel hautak takah 2-0 a hnehna changin point thum hlutak an hmuh belh. Champions lai Arsenal hain season tharah vawi 4 khel tawhin an la chak vek a, point 12 hmuin table chung ber an luah. Pathianni zanah Manchester City an chak a nih chuan Arsenal dinhmun hi a la danglam thei thung. Gunners in table chung ber an luah lai hian Sunderland chuan khelh 4 atanga point 4 hmuin 14-na an luah ve thung.
Team lian an chak zo lo
Inrinni zanah Arsenal in hnehna an chan laiin team lian Liverpool, Chelsea leh Tottenham ten hnehna chang zo lovin an khingpuite nen an inhnehtawk hlawm. Hetihlai hian nipui bazar laia an player tha ch^n hnem tak Aston Villa chu an mualah ngei an lo tlawm ve thung.
Champion tura rinkai zinga mi Liverpool hi Anfield-a an mikhual Fulham nen goal awm lovin an inhnehtawk. Reds hian khelh li atangin point 6 chauh an la hmu a, paruknaah an awm mek a, manager thar hnuaiah beisei angin hma an sawm hleithei meuh rih lo. An mualah Liverpool an chak zawh loh lai hian Tottenham leh an mikhual Everton chu goal awm lovin an inhnehtawk ve bawk. Season liam taah tlakhniam pumpelh thei hram chauh Tottenham hi an talbuai chhunzawm zel a, season tharh vawi li khel tawhin point 2 chiah an la hmu a, table hnuai lamah an awm.
Inrinni zana inkhel dangah manager thar Xabi Alonso hnuaiah phur taka inlan Chelsea chu Stamford Bridge-a an mikhual Hull City nen 2-2 in an inhnehtawk. Chelsea tan hian an player thar Morgan Roger a chetha chhunzawm a, an hmahruaina goal a thun.