Chibai duh loh vanga hrem tawk Ukrainian Olga

Chibai duh loh vanga hrem tawk Ukrainian Olga
July 22-30, 2023 chhunga Milan khawpuia World Fencing Championships khelh mekah Ukraine ngunhnam vai thiam Olga Kharlan chu a elpui pakhat Russian Anna Smirnov a chibai duh loh avangin hremna na tak pek a ni a, tournament kal laia inlan chhunzawm thei lo turin hnawhchhuah (disqualify) a ni!
Olga hi Russia-in Ukraine a run hnua Ukrainian fencer zinga Russian emaw Belarusian emaw tum hmasaber niin, Milan khaw invaiah hian 15-7 hnehna chang mah se inkhelh bana Smirnova chibai buk tumna a chhanlet duh loh avang leh a tumpui Russian Smirnova hian Ukrainian chet dan protest-a minute 45 lai a thut tlat hnuah kum 32 mi Olga Kharlan chu tournament kal lai atanga hnawhchhuah a ni zui ta a ni.
A hnuah Kharlan hian a chet dan sawifiahin, Ukrainian athlete-te chuan an ram run kawnga ram inthurual pahnih Russia leh Belarus infiammite hmachhawn chu inpeih reng mah se anni nena chibai inbuktawn an duh lohna a lantir tih a sawi.
Russian Smirnova kha infiamna danga an kalpui ang bawkin Russia hminga a chhuah phalsak a ni lo a, neutral flag hnuaiah championship hmachhawnin, women’s sabre individual first-round contest-a a chak loh hnuah a tumpui chibai a tumna hnawlsak a nih avangin a lungawi lo a, a hnuah official chuan bout dang khelh leh phalsak a nih thu a hriat hnuah a kalsawn duh chauh a ni!
Kharlan kha individual world champion vawili a nih tawh bakah Olympic medal ngawt pawh pali a awrh tawh a, an ram tana a dinna a sawhngheh tlat avangin women’s sabre individual khel zui thei lo tura hnawhchhuah a ni.
Chutih laiin, Kharlan hian International Fencing Federation (FIE) president Emmanuel Katsiadakis ka ngei atangin tumpuite chibai loh a thiang tih a dawng niin a sawi a, chibai aia ngunham insiktir zeuh an pawm mai theih thu president hnen atangin a dawng tih a sawi a, “A tawngkam ngei ka dawn avang khan chibai loh chu tournament hmachhawn zui zel turin a him tawkah ka ngai a, mahse, a lo ni leh miah si lo,” a ti.
Kharlan hian last-32 lamah Bulgaria fencer Yoanna Ilieva tum leh tur a ni a, mahse, a inlan zui zel a rem ta lo.
Ukraine fencing federation (NFFU) president Mykhailo Illiashev chuan Kharlan chunga hremna lekkawh chu an khinlet ngei tur thu a puang ve nghal.
Ukraine president Volodymyr Zelensky adviser Mykhailo Podolyak chuan an ram infiammi hnawhchhuah a nih hnu lawkah Twitter kaltlangin Anna Smirnova leh Russian sipai pakhat awmdun lai thlalak a phochhuak a, “Hei hi han en ula, Russian fencer Anna Smirnova hian Ukrainian-te thata a kan khawpui tamtak tichhetu Russian army a ngaihsanzia a pholang a, chuti chungin fair taka chak kan fencer chu FIE lamin Russian chibai duh loh vang ringawtin a hnawtchhuak a nih hi! Hei hi FIE dinna tur a ni meuh ang maw? Russian pawisate hian thisen rim an nam a ni lo’m ni?” tiin a auchhuak.
Tennis khawvel lamah pawh Ukrainian player-te’n an hmelma ram pahnih Russia leh Belarus player-te an chibai duh lo lai kan thlirliam fo a, hremna an tawrh phah lem lo a, fencing-ah erawh ‘disqualify’ thlengin an tawrh phah ta a ni.
Tarlan tawh thin angin, tunthla tir lam khan Ukraine player leh Wimbledon semi-finalist ni bawk Elina Svitolina chuan an ram lama a chipuite thlavang hauhin Russian leh Belarusian player a tumpui tawh phawt a chibai duh lo a, chutiang mi chuan a chipui Kharlan-i thutlukna siam thlawpin, an mite tih tur dik tak niin a sawi a, Russian-te’n an dinna an zahsak duh lo chu a dem thu a auchhuahpui nghal.
Kharlan-i Ukrainian team-mate leh Tokyo 2020 bronze medallist ni bawk Igor Reizlin pawh Nilaini khan World Fencing Championships kal mek bout pakhata Russian Vadim Anokhin hma-chhawn tur a nih laiin Russian hma-chhawn ai chuan a inlan duh lo tawp!