Hnam kawng sattu national leader kan nei – MNF adviser

Zofaten hnam kawng sattu, national leader Pu Zoramthanga kan neih avangin state dang hruaitute pawhin an rawn bei ta rap rap tih MNF adviser Rochhunga Ralte chuan a sawi.
Thawhtannia MNF office Mizo Hnam Runa inkhawmah MNF adviser chuan Mizoram political party zawng zawngah hruaitu nei tha ber an ni tih a sawi a. Party thenkhat hruaitute chu zu leh thildangah an fihlim chiah em tih hriatchian an ngai a, principle mumal nei lo, pharkual reng mai chu ram hruai turin Pathianin min pek a ring lo tih a sawi.
MNF hruaitute erawh ram leh hnam tana an inpekna, an rinawmna, Pathian tih mi an nihna, mi biangbiak thiam leh hlim reng thei an nihna te chu an chhuanawmin, an thawhhona pawh a tha hle niin a sawi a. Mizo hnam sipaite chu Zofate kawngzawh tur sattu an ni, tiin, Hinduism sakhua lo dangtu an ni tih thu a sawi.
Tuna chief minister, minister leh MLA te hnathawh aia ropui a la awm lo tih Rochhunga Ralte hian a sawi bawk a. Chief minister huaisen zarah ramri kan humhalh thu te, kan hnam kawng sattu, national leader kan neih avangin state dang hruaitute pawhin an rawn beih tak rap rap thu te sawiin, “Mizote tan MNF party-a awm hi a him a ni,” a ti.
Chief minister Pu Zoramthanga vision a la hlawhtling dawn chauh tih a sawi bawk a. Ram hruaitu vision neilo chu hruaitu tlak an ni ngai lo tih a sawi a ni.