Taylor Swift ‘Anti-Hero’-in Spotify-ah 1B stream a hlawh tawh

Taylor Swift hla hit ‘Anti-Hero’ chuan Spotify-ah vawi tluklehdingawn stream a hlawh tawh a, Swift hla zingah he streaming service-a vawi tluklehdingawn stream kai thei palina a ni a, Swift pawhin a Instagram-ah a hla ngaithlatu te hnenah lawmthu sawiin, “Thanks a billion guys” tiin a post a ni.
Spotify-ah hian hla tluklehdingawn chin stream kai thei hi 449 a awm tawh a, chung zinga hla pali chu Swift hla a ni a, ‘1989’ album-a a hla ‘Blank Space’ leh ‘Shake It Off’ bakah Fifty Shades Darker soundtrack, Zayn Malik nena an zai dunna “I Don’t Wanna Live Forever” te chu vawi tluklehdingawn en an lo hlawh tawh bawk a ni.
‘Anti-Hero’ hla hi October 2022-a a tihchhuah kha niin, Billboard Hot 100 (singles) chart-ah pawh kar riat chhung No.1 kaiin, Swift hlaah chuan he chart-a No.1 ni rei thei ber a la ni.