Thla thum hlawh la tawh lo ten lak thuai an phut

Samagra hnuaia Mizoram sawrkara thawk ten thla thum chhung hlawh an lak tawh loh avangin a rang thei ang bera ngaihtuah sak turin sawrkar an phut tih an sawi.
Mizoram RMSA Employees Welfare Association thuchhuak chuan, Samagra hnuaia thawk mi 5000 chuang chuan thla thum – May, June & July hlawh an lak tawh loh avangin an mangang takzet tih sawiin, ‘A hun takah hlawh kan la ngai lo hle a. Thla hnih thla thum te hlawh la loin kan awm fo thin. Nupui fanau / pasal fanau hrawk chawm kan ni hlawm a, chhungkaw khawsak phung hrim hrim bakah kan fate zirna senso thlengin kan hlawh la har lutuk hian nasa takin min nghawng a, a manganthlak hle,’ a ti.
Samagra hnuaia thawkte zingah hmunpui lama thawkte awm bawk mah se, a tam zawk chu mahni in lum chhuahsana hmun kilkhawr tak taka thawk an nih avangin, hetianga an thawh hlawh ngei rei tak tak an la thei lo thin hian khawsak a tibuaiin chet lak a tiharsa takzet tawh tih an sawi a. Sawrkara thawk, Samagra hnuaia thawkte hlawh lak loh zawng zawng chu a rang thei ang bera ngaihtuah sak a, pek thuai an phut tih an sawi a ni.