Heroin zuar kum 10 tang dawn

Heroin a zawrh avanga man chu court-in thiam loh chantirin, jail-ah kum 10 tang tur leh cheng nuai khat chawi turin a hrem.
2021 March 18 chawhma dar 10.30 khan Excise & Narcotics department chuan Lalengzauvi (47) Lunglei Venglai chu heroin gram 331.500 (hawng 24) a kawl avangin ama dawr nghah lai, Lunglei Venglaiah an man a. NDPS Act 1985 hnuaiah thubuai ziahluh a ni.
He case Special Court (ND&PS Act) Lunglei District judge F Rohlupuia chuan ngaihtuahin, a mantu leh a mana te lam atanga thuhretute thu a ngaihthlak hnu ah leh finfiahna hrang hrang a enfiah hnu ah kumin August 2 khan thuthlukna a siam a, thiamloh a chantir. August 3 khan hremna a puang zui a, rim taka kum 10 chhung jail tang tur leh sumfai cheng nuai khat chawi turin a ti. A sumfai chawi tur hi a neih loh chuan kum khat dang jail tang belh turin a ti a ni.
Thiamloh chantir tak Lalengzauvi chuan heroin hi Champhai atanga Rs. 4,80,000 a lak, hlep uma Lungleia hralh a tum thu leh tun tum hi hetiang thil a tih vawi hnihna a nih thu te, a tih hmasak zawkah hian man a tawh loh thu te court hmaah a puang a ni.
Dan bawhchhiatn an phu tawk anga hrem an nih theihna atana tha leh zung leh ngaihtuahna senga prosecution witness-a ding, Lunglei Venglai YMA hruaitute chungah Excise & Narcotics Department chuan lawmthu a sawi a ni.