Hmundanga sum pawhpen tumah Sports minister puh

Hmundanga sum pawhpen tumah Sports minister puh
MNF party chuan Falkland Venga indoor volleyball hall siamna tura sum tihfel vek tawh chu Sports minister-in a bial chhunga indoor volleyball hall awmsa tihchangtlunna atana pawhpen tumah an puh a. A hmanna tur diktaka dah thuai a nih loh chuan dodal zel an tum tih an sawi.
Falkland MNF Group thuchhuak chuan, Falkland MNF Local Council liamta leh Mizoram Volleyball Association-in indoor volleyball hall neih theihna atana hma an laknaah SASCI Part-IX ah telh niin, Finance department-in kumin June 11 khan expenditure sanction order a chhuah tawh a, hemi atana sum dah vaibelchhe 8 hi Sport minister bial indoor volleyball hall upgrade-na atan pawhpen tuma hma lak a ni a, vawiin thlengin Falkland Indoor Volleyball Hall atan hmalakna a awm thei rih lo tih a sawi.
Hetiang hi thil awm dan a nih avangin, September 14 khan Sports minister Lalnghinglova Hmar hnenah lehkha thehlutin, expenditure sanction an hmuhna, “Indoor Volleyball Hall at Falkland” tih ang ngeia hmang tur leh hna tan thuai tura ngenna an thehlut tih MNF Group Falkland hian an sawi a. Minister hi a zin avangin a staff-te hnenah lehkha hi an pe a, a copy hi an bialtu MLA, minister Lalthansanga hnenah an pe tel tih an sawi bawk.
Thawhtanni tlai vek khan Falkland MNF Group hian Falkland Volleyball Court pengah, he sum pawhpen tum duh lohna lantirin an pungkhawm tih an sawi a. Hall hi an chang lo a nih chuan a tawp thlenga dodal an tum tih an sawi.
MNF Group hian Falkland-a all NGO leh all political party chu khawtlang hmasawnna atan thlawp tura sawmna lehkha an pe vek tih an sawi bawk.