Champhai Jail-ah a leng thei bak aiin 80 chuangin an tam

District Jail Champhai chu mi 105 lenna tur niin, mipa 85 leng thei tura duan a ni a. Tunah tang 189 awmin, mipa 175 an ni.
Ningani khan District Jail hi Champhai bawrhsap James Lalrinchhana chuan a tlawh a. Jail superintendent leh a thawhpuiten lo dawngsawngin, District Jail hmunhma a fan bakah jail chhung inrelbawl dan, hmanrua awm mek leh an mamawh a zirchiang. Silpaulin, volleyball leh net leh Independence Day 2023 lawmna atan sumfai Rs. 12000 a hlan nghal.
Jail tangte chu ram leh khawtlang tana mi tangkai nih tuma inpuahchah tura chahin, an taksa leh rilru hriselna ngaipawimawh turin a chah. Jail-a an awm chhung tha taka hunawl an hman theihna’n leh thiamthil hrang hrang zirna (skill development) ruahmante a ngaipawimawh tih bawrhsap hian a sawi.
District Jail thawktute leh jail tangte hian an mamawh hrang hrang lo thlenin, bawrhsap chuan tih hlawhtlin sak a tum thu a sawi a. Jail tualzawl siamthat hna chu thawh thuai a nih tur thu a sawi bawk.
Champhai District Jail hi Sirte Tlangah awmin 1990 November 29-a hawn a ni a. Mipa 85 leh hmeichhia 20, an vaiin mi 105 an leng. Tunah mipa 175 leh hmeichhia 14, an vaiin 189 an awm a; jail hi a chep hle tih thawktute hian an sawi. Thawktu 32 an awm a ni.
Jail tangte zingah hian ruihhlo avanga man (ND&PS Act) tam berin mipa 111 leh hmeichhia 13 an ni a. Mipa 4 tualthah case avanga man niin, mipa 28 chu pawngsual /POCSO case-a man an ni a, mipa 24 rukruk case-a man an ni.