Thil ruk hralh theih vangin rukruk hluar…
Aizawl District Police chuan tunlai hian Aizawl khawpui chhungah mobile phone ruk a hluar tih thuchhuah an siam a. Khawlaiah te leh social media hrang hrangah a man pangngai aia tlawm uchuakin an zuarin an hralh chhawng leh thin a, hei hian mobile phone ruk a ti hluar hle, tiin thuchhuahah an tarlang a.
Ruk a ni tih hre reng chunga bungrua eng chi pawh lo lei hi Indian Penal Code hnuaia dan bawhchhiatna a ni a, Sec 411 IPC (dishonestly receiving stolen property) hnuaiah thubuai siam theih a ni, tiin thil ruk lei lo turin mipui an ngen nghal bawk a ni.
Mi thil ruksa lo dawn emaw lo kawl emaw chu kum thum thleng lung in tantir emaw pawisa chawitir emaw; a pahniha hremna pek kawp theih a ni, tiin Sec 411 IPC chuan a tarlang a. Mi thil ruksa lo lei a, lo kawl chu rukru ang thova chhiar an ni tihna a ni ber awm e.
Chuti a nih chuan, rukruin a thil ruksa a hralh thei viau a nih chuan, rukhmangte thurualpui theih an tam tihna a ni ber a; rukruk tihluartu pawh heng mi thil ruksa lo lei thinte hi an ni, a tih theih bawk awm e.
Rukru chu man chhuah a nih bawk si loh chuan, rukru ang bawka rilru dik lo putu, tlawm taka ruksa lo leisak duh tawk an awm ve zel bawk si tihna a ni a, rukruk chu a hluar zel mai dawn tihna a ni.
Hmalakna tur chiangsa chu, rukru man chhuah tuma ngawrh zawka beihpui thlak a, rukru manchhuah an nih chuan an thil ruk tihralna chhui chhuah a, a lo leisaktute chungah pawh dan anga action lak nghal zel a, chu chu public-a puanzar zui zel mai hi a ni; chu chuan rukrute market a tihhniam phahin a rinawm. Rukrute hian an thil ruksa lo leisak zeltu an hmuh loh na na chuan market tha lo chu an chhunzawm reng peih bik lovin a rinawm.
Mipui leh dawrkaite pawh tun aia kan fimkhur zual chu a pawimawh hrim hrim a. Chutih rualin police lam pawh, mipui himna tura hna thawk an nih angin, zan lama patrolling te pawh ngawrh zawkin kalpui leh thei se a duhawm hle.
Ruihhlo a hluar a, ruihhlo ngai an pung a, ruihhlo ngaiten pawisak an neih tawh thin loh avangin, rukruk mai piah lamah, insuamna te pawh hi la thleng thei a ni. Tunah hi chuan rukru case kan la buaipui a, nakinah chuan insuam case te pawh la thleng thei a ni a, chutiang thleng lo tura tun atanga kan tanrual hi a pawimawh hle a ni.