Mizo dana man inhlan inneih puitlinga pawm rel

Mizo dana man inhlan
inneih puitlinga pawm rel
State Law Commission chuan biak ina inkutsuih kher ni lo, Mizo dana man leh muan inhlan chu sawrkarin inneih puitlinga a pawm turin a rel.
Mizoram State Law Commission thutkhawm vawi 42-na chu an chairman Lala Khobung hoin Zirtawpni khan neih a ni a. ‘Mizo Inneih, Inthen leh Rokhawmna Dan 2024’ siamthat chungchang an sawi ho. He dan siamthat hi hun engemawti lai atang khan Commission hian a lo buaipui tawh a. Tun thutkhawmah hian a tam zawk chu zawhfel a ni tih sawi a ni. He dan hi Law Commission hmasa bera chairman R Lalrinawma hoa buaipui niin, a hnua chairman John Siamkunga hunah zut mam lehin, kum 2014 khan Mizoram Legislative Assembly chuan hman theih turin a pawm a. 2015 February 13 atanga hman tan a ni.
He dan hi siamthat ngai nia hriat a nih avangin Law Commission pathumna chairman Lal Khobung hoin enzui a ni a. Siamthat rawtna pawh Central YMA, MHIP Gen. Hqrs. bakah mimal atangtea dawn a ni. Rawtna atanga an pawm langsar zingah ‘Mizo’ tih dan dinglaiin a hrilhfiah chu sawrzim hret a ni a. Inneihna chungchangah tihdan pangngaia biak ina kut insuih la kalpui thoin, biak in thleng kher loa Mizo dana man leh mual inhlan chu inneihna tlingah pawm nise, tih a tel.