Ramin A Ko Che

BY Lalchhandama Colney
Ph – 9862982321

Khawvela mihring tungchho tawh phawt chuan hming, inkohna tur kan nei theuh a ni. Kan chenpui nungcha leh ran thenkhat te pawh hi hming kan phuahsak bawk thin a ni. Pathianin Eden huana mite a rawn tlawh pawh khan an hmingin a rawn ko a ni. Miin min koh tawh chuan eng emaw tul tak a awm duh khawp mai, nih loh chuan kan inko mai mai loh khawp mai. Vawiina kan thupuiah pawh kan inkoh thu kan hmu a, chuvang chuan tih tur eng emaw tul tak a awm a ni phawt mai. Inthlang ram kan ni a, kan aiawh, roreltu tur kan thlang dawn a ni, hei mai bakah hian democracy ramah chuan mipuiten tih theih kan ngah hle. Khawvelah chuan mipuite zalenna ram ho chu an lian tual tual a, a changkang tual tual bawk, heng zingah hian Mizoram, Mizote pawh kan tel ve a ni, a lawmawm hle mai. Mahse, thil hi a hmangtuin a zir loh chuan thil tha tak pawh hi thil chhe mai maiah a chhuak thei tho a ni.
Aw le, kan hriat theuh angin kan inthlang dawn hnai, chuta tan chuan eng nge ka tih ve theih, eng nge kan tih loh tur, tih lam hawi zawngin kan ngaihtuahnate i’n lo seng tlang dawn teh ang. Ram riangte
Mizoram chu tlangram chhengchhe tak, mahse, englai pawh mai deuh thoa hring dup reng mai a ni. Khawpuiah pawh boruak ala thianghlim hle, mahse, hetih lai hian hnam hrisel vak kan ni lo, kan damrei zawng chawhrual hi a sang lo tlat mai. Kan thalaite zingah ruihhlo ngai, zu vanga naupang te te a thi an tam hle. AIDS-te pawh hi a hluar hle a, a tam zawk chu sex hmansual vanga kai an ti; tin, cancer-te pawh kan ngah cher cher hle. Thianghlimna leh hriselna lam kawnga zirtirnate kan hre hle a, mahse, a zawm lam hi kan uar vak lo hle. Kristianna lam kawngah pawh hian kan sang viau niin a hriat theih a, mahse, eirukna, thamna, dawtsawi pawi tih lohna, etc., a tamin kan ti reng tho. Mi dik chu a hausak vak loh chuan eng he huah kan ngai lo, hetih lai hian sum ngah tak te erawh kan pathian hmuh thuak mai thin. Kan hre theuhin ka ring Mizote kan thil thlir dan, tih dan te kan siamthat ngai lai a tam, mahse, kan thanhnan tawh si, hetiang kan nih reng chuan chimral kan awl kan ang a, kan biak Pathian pawh hian min la hrem ngei ang. Party-te I Fimkhur Ang
BJP kan ni emaw PC party kan ni emaw Pathian thu a nih chuan kan sawrkar thut thei a ni, chuvang chuan political party-te kan va pawimawh em. Mipuite kawng dikah kan hruai thei a, kawng dik loah kan hruai thei bawk a ni. Ram hruaitu tur te in ni a, in tling tawk tur a ni, tling tawk turin in inbuatsaih pawh a tul hle mai. Lal Isuan, in felnain farisaite felna a khum tur a ni, a tih ang deuh khan, party mi leh sate a chhe berah kohhran pulpit rawngbawltu hen tal in nih a va ngai em. Ram hruaitu tur atana mi belhchian dawl mang lo, tha awm taka lang ve si te kan chhawp chhuah mai zawngin a pawi dawn em mai. Tin, kan party policy, manifesto-te pawh kan duan fimkhur a va ngai em, chuti a nih loh chuan mipuite min ti piangsual zualtu mai mai a ni thei a ni. Kan campaign-naah te pawh theih tawpin kan tang ang, mahse, tih chin, pelh loh tur te nei ila, ava tha dawn em. Thudik mang lo hmanga insawichhiatnate, tlin loh tur tiam te, tih loh theih se, hengte hian rilru a hruai sual thei a ni. Eng party tan pawh tun hi fimkhur a tul lai tak a ni e.
Lo Pen Chhuak Rawh
Kan ram dinhmun i hria a, i ram dinhmun i hria,vawiinah i ram tan lo pen chhuak rawh, ala tlai lo ve. I lo vei ve em em thin Mizoram chu a siam tha turin lo pen chhuak rawh le. I in candidate duh a nih chuan kawng inhawn lai a ni e, ram tana rinawm tur, a ngaihna hria, taima i nih phawt chuan. Campaigner tur pawn a hun lai a ni e, mitha leh dik chu tlinpui ngei turin. Party tin te dik tak leh fel taka ti turin ram tan i thawk chhuak ang. Mipuite pawh kan chanvo, vote thlakte ti turin i inbuatsaih ang, sum leh eng eng emaw therhlo hawisan ngam turin ram tan i pen chhuak ve ang. |awngtaimite pawh kan pawimawh hle mai, mi tha, dik, huaisen, kan thlan chhuah theih nan i pen chhuak ang/i tawngtai ang. Kohhran mi leh sate pawh kan pawimawh hle mai, biak inah heti lam hawi kan sawi tam tul hun lai tak a ni. Khawi hmunah pawh ram hmangaihtu tak tak te kan chet a hun, nakum lamah chuan a hun tawh mang lo dawn a ni, chuvang chuan, huaisen takin, taima takin lo pen chhuak rawh. Kan hriat theuh angin kan ram mai bakah mipuite pawh hi siamthat kan ngai a ni, mi rinawm, dik ni turin. Chumi ti thei tur chuan ram hruaitute an pawimawh ber awm e. Enga tinge Mizote kan hoh em em, dik mang lova thil tih te kan ngam em em, tu min zirtir nge ni le. A chhannaah chuan tudang an ni lo, kan ram roreltute maw le, vote an zawn lai atangin an ti dik lo va, mipuite min ti vir khawlo zo ta a ni ber mai e. Nia, han indem thei vak chu kan awm chuang lo va, mipuite pawh kan dik bik lo, alo ni ve reng tho. Aw le, vawiinah chung zawng zawng siamthatna hun chu a inhawng mek, kan inthlang dawn kan campaign mek mipuite pawh vote thlak turin kan inpuahchah mek. Tunah hian Mizoram siamtha turin, mipuite rilru sukthlek siamtha turin, kan awmna hmun theuhah Ngenngawl takin Ramin Min Ko theuh a ni.