A thuphungin Tottenham leh Bayern an inrem

A thuphungin Tottenham leh Bayern an inrem
Vawi engemawzat an indawr hnuin English Premier League club Tottenham Hotspurs leh Bayern Munich te chuan England captain Harry Kane chungchangah a thuphungin inremna an nei thei ta a. An indawr fel zui thuai tura ngaih a ni.
German champion Bayern Munich hian an forward pawimawh Robert Lewandoski an chhuahtir hnuin an duh anga tha forward an nei thei rih lo. Liverpool atangin Sadio Mane la lut bawk mah se an beisei a phak lova. Boruak tha lo neuh neuh an neih bawk vangin Mane hi Saudi Pro-League club lian Al-Nassr hnenah an hralh fel der tawh. Champions league-ah tha zawka inlan turin forward tha an mamawh tih an hria a, an lak duh ber chu England leh Tottenham tana goal thun hnem ber Harry Kane a ni.
Bayern hian Kane lak tumin Tottenham hi tum thum ngawt an dawr tawh a, man leh mualah an inrem theih loh vangin an la mai thei lo. Kane hi an duh hneh em vangin vawi thum an hlawhchham hnuah pawh an la beidawng duh chuang lova, a vawi li nan nilai ni khan an dawr nawn leh a. Tottenham nen hian a thuphungin inremna an nei thei tawh a. Bayern in 100m euros (£86.4m) an tawktarh chu Spurs hian an pawm thei niin tarlan a ni.
England leh Spurs goal thun khawl Kane hi EPL-ah tum thum ngawt Topscorer a ni tawh a. Tottenham tan hian inelna hrang hrangah vawi 435 khelin, goal 280 zet a thun tawh a, Spurs tan goal thun hnem ber a ni. A inzirchhuahna Tottenham tan hian Premier League-ah vawi 320 khelin goal 213 a thun tawh a. EPL-ah goal thun hnem ber Alan Shearer record tluk turin goal 48 chiah a mamawh tawh.
Kane ngei pawh hian hian Shearer record khuma EPL-a goal thun hnem ber nih a chak thu a lo sawi tawh. EPL club lian Manchester United in lak an duh viau a. United hi zawm thei ngat se chuan atan trophy lak theihna remchang leh Alan Shearer record khum theihna kawng a inhawng zau leh zual tura ngaih a ni. United in lak duh viau mah se goal a thun theih em vangin Tottenham thuneituten EPL-a an elpui lian lakah hralh an tum lo bur thung. Heti a nih vang hian United pawhin Kane lak tumin an dawr buai duh tawh bik lo.
Bayern leh Tottenham te hian Kane chungchangah a thuphungin inremna nei tawh bawk mah se Kane hian thutlukna a siam ve leh a ngai dawn a. Tottenham-ah a cham dawn nge, Bayern Munich a zawm dawn tih chungchangah thlu a pawt chat zui ve leh ang. Report thenkhatah chuan manager thar Ange Postecoglou hnuaiah chona thar hmachhawn a chak niin tarlan a ni. Manager thar Ange Postecoglou hnuaiah player pawimawh tak ni dawn bawk mah se contract thar ziah erawh a la tum chuang lo thung. Contract thar a ziak lo a nih chuan kum khat hnuah man leh mual tel tur awm hauh lovin a chhuak thei dawn tawh mai bawk si a. Spurs hian a lo thlawna chhuahtir ngawt erawh an hreh viau thung. Heti a nih vang hian Kane pawh hian club lian zawk, trophy lak hma theihna tur zawk Bayern Munich hi zawm a duh ngei tura ngaih a ni ve mek bawk.
Nipui bazar inhawng meka ngaihven hlawh tak Harry Kane hian kum 2015-16, 2016-17 leh 2020-21 khan Premier League Golden Boot a dawng a. England tan goal 58 thun tawhin, Three Lions tana goal thun hnem ber a ni mek bawk.