Ram mamawh education

Nimin khan H&TE minister Dr. R.Lalthangliana hovin New Education Policy (NEP) 2020 kalpui chungchanga hmalak tawhnate thlirhona leh inrawnkhawmna hun neih a ni a. Minister chuan NEP-in a phut chin mai ni lo, kan ramin a mamawh angte nei thei tura theihtawp chhuah turin academician kalkhawmte a chah a.
India hian 1986 khan National Policy on Education (NPE) a kalpui tan a, kum 34 zet a ral hnuah 2020 atang khan education policy thar (NEP 2020) chu hman a lo ni leh ta a. NPE kalpui a nih lai pawh khan Mizoram chuan education policy ang diak diakin a kalpui hlei thei lo niin a lang. Tlai khawhnuah Continuous and Comprehensive Evaluation (CCE) kan han hmang ve a, mahse a nihna tur angin kan kalpui thei chiah lo. CCE hian zirlaite a tam thei ang ber practical neihpui a phut a, chhiar ngawr ngawr leh by heart ringawta hun pum hmang lovin, naupangin a tam thei ang ber activity hrang hrang an nei tur a ni, tih a ni. Classroom-a thut ngawr ngawr leh zirlaibu chhiar ngawr ngawr hmanga inawi tlei thin kan ni a, chu chu kan thatpui em em lo. CCE ang hi kan ramin a mamawh education system a ni; mahse, a nih dan tur anga kalpui tluantling si lovin, dan zawm lo nih hreh vanga ‘run dalah’ ti niawm fahranin tui vak lo chungin CCE hi kan kalpui ni berin a ngaih theih awm e. Kum sawm vel zet kalpui a nih tak hnu hian CCE hian zirlaiteah eng tiang chen chiahin nge hmasawnna thar a thlen tih hi sawi thiam a har a, heti zawng hian academician-te hian buk lung an lo khai tawh reng em tih hi zawhna a ni nghal awm e.
Tunah education policy thar kan hmang tan leh ta a. Tuna Education Policy thar hian khawvel hmasawnna thar milin thil thar tam tak a rawn chhawm (introduce) leh dawn a. Eng system thar pawh hmang dawn ila, a pawimawh ber chu, zirlaiten thiamna tak tak (indepth knowledge) an neih theih dan tur ngaihtuah hi a ni ber a. Chumi tur chuan elementary stage atanga kan duhtui a, kan uluk a pawimawh a, chu chu Mizoram bikin kan mamawh education a ni awm e.