Hawaii-ah nunna chan 89 tling tawh

Hawaii-a kangmei chhuak nasa tak Maui fire tih mai chuan Lahaina khawpui a nuai hnuah mi sawmriat pakua laiin nunna an chan phah tawh a, tun kum zabia US kangmei chhuak rapthlak ber a ni bawk.
Nunna chan hi an la awm belh teuh thei tiin Hawaii Governor Josh Green chuan a sawi a. Nunna chan te tute nge an nih finfiah nan forensic hmanga hmalak a nih thu a sawi bawk a.
Mi za tel teh meuh an chin hriat lohin an awm mek a, chutih rualin mi tam tak te chu chenna hmun siamchawpah an inbengbel mek bawk.
Kangmei chu ‘Hawaii in khuarel chhiatna a tawn tawh azawnga rapthlak ber a ni’ tiin Green chuan a sawi a. “A la dama te tanpui chu kan tihtheih awm chhun a ni a. Tuna kan thlurbing mek chu chhungkua inhmukhawm theia siam leh chenna hmun peka health care tha pek a chumi hnua intundin that leh a ni,” tiin a sawi bawk.
Kangmei hi thunun a ni tawh a, mahse thelhmit vek tur chuan hun a la duh deuh dawna ngaih niin a bik takin Lahaina leh a chhehvel chu kangmeiin a sawp nasa zual a ni.
Thuneitute chuan combing operation nei mekin tuipui kam te chu uisathiam hmangin mihring ruang zawngin hma an la mek a. Tun dinhmunah chuan 3% vel chauh an la tuam thu Maui Police Chief John Pelletier chuan a sawi a.
“Tute nge an nih hriat nan DNA testing rang taka neih a ngai a, mi 89 te hi an hming bulah John leh Jane Doe angin kan la chhinchhiah vek a ni,” tiin a sawi.
Jeremy Greenberg, a senior official at the Federal Emergency Management Agency (FEMA) chuan khawpui bikah search and rescue te puii turin mi tirhbelh an nih thu sawiin ‘tuna kan ngaih pawimawh ber chu dam te an awm em tih zawn a ni’ tiin a sawi bawk a.
Greenberg chuan mi 1,000 dawn an chin hriat loha an awm mek thu leh mahse heng zinga a tam zawk te chu an hima an ngaih thu a sawi bawk a.
Maui a War Memorial Complex chu emergency shelter atana hman niin hetah hian mi za tel tehmeuh te dahkhawmin an awm mek bawk a. heng hmunah hian mamawh engkim battery atanga tui thianghlim in tur leh generator thlenga bun tawh niin thuamhnawte pawh mamawh ang zela lak theiha siam a ni bawk a.
War memorial shelter team member Keapo Bissen chuan chhungkua himdama inhmu an tam a, chung chu heng chhiatna kara hlimna thlentu a ni mek a ni tiin a sawi.
Kangmei avang hian Lahaina area-ah chenna in 2,000 chuang a kang chhia anga ngaih a ni a, Honoapiilani highway chu hawn a nih zet hnuah khar zui a ni bawk.
Hei vang hian mi tam tak kawngpui kamah tangkhangin an awm mek a. Mapui dinthar leh tur hian a tlem berah $5.5 billion sen a ngai dawn niin Pacidic Disaster Center (PDC) leh FEMA, Washington atanga relief lam buaipuitute chuan an sawi a.
Helicopter pilot Richard Olsten chuan Maui lawngchawlhna hmuna lawng dah te pawh a kang deuh vek tiin a sawi a. “Historic building, Biak In leh missionary building te pawh meivapaha chang vek mai” tia sawiin, “Tourist area lian ber dawn leh restaurant te awmna te chu meivapah a chang vek a ni,” tiin a sawi bawk.