Sri Lanka-a Easter Sunday bombs-ah mi 15 thiam loh chantir

Sri Lanka-a High Court chuan kum 2019-a Isua Thawhleh Nia bomb tihpuah, mi 270 thihna leh mi 500 chuang hliam tawrhna thlengah mi 15 chu a ruahmantua puhin thiam loh a chantir.
An zingah hian thihchilhtuten chetna duangtu ber an tih, Naufer Moulavi pawh a tel a, mi pakua erawh thiam chantir an ni.
Biak in pathum leh khualbuk changkang chi pathuma bomb puak hi kum 2009-a tual chhung indona a tawp hnua Sri Lanka-a mi sual chetna lian ber a ni a, thi zingah mi 45 an tel.
Bomb tipuaktu mi pakuate chu an thi vek a. Chhuitute chuan Islamist kal firfiakte tihah an puh a, a titua an puh mipa 25 chu Sri Lanka-a sakhaw zuitu tlem, Muslim an ni a, pakhat chu a tan chhungin a thi.
Court hian hremna pek tur a la puang lo.
Thiam loh chantirte hi dan hrang hrang 23,000 chuang bawhchhiaa puh an ni a, Colombo-a High Court-ah hian tang bus pahnih hmangin an kut phuar (handcuff) chungin inlantir an ni.
Thi zinga a tam zawk hi Sri Lankan an ni a, naupang tam tak an tel.
Ram dang mi thi zingah hian Indian 11, Briton pariat leh American panga an tel a. Australia, Bangladesh, China, Denmark, Japan, Netherlands, Portugal, Spain, Sweden, Switzerland leh Turkey ram mi an tel bawk.
Beihna a thlen khan Sri Lankan thuneitute chuan ‘intelligence-ah tihhmaih lian tak’ a awm tih an sawi a. An parliament-ah India atangin beihna thleng thei hriattirna an dawng a, thuneitute hnenah an hrilh lo.
Kum 2023 khan Supreme Court chuan president hlui, Maithripala Sirisena-a chu ram himna tiderthawng thei thlen thei a ngaih pawimawh loh avangin a tuartute zangnadawmna pe turin a lo ti tawh.
Thla hmasa khan sorkar hotu lian pahnih chu an hna an thawh that tawk loh avangin thi turin hrem an ni bawk.
Kum tam tak chhung Sri Lankan-te chuan Easter attacks-a thite tan dikna hlenchhuaha a awm theih nan nawrna an lantir fo thin.
Court-in thutlukna a puan mek lai hian intelligence chief hlui, Suresh Sallay-a chu chhui mek a ni bawk a. Sallay-a hi Islamist kal firfiakte a thawhpui nia hriat a ni a, February khan man a ni a, an puhna hi a pha.
Kum 2023-a British broadcaster Channel 4-in documentary a tihchhuahah beihna thleng kha Sri Lankan politics-a huhang ngah tak, Rajapaksa chhungkaw len lehzual nana tih anga sawi a ni a. President hlui, beihna thlen hnu lawka thlan tlin, Gotabaya Rajapaksa chuan hei hi a pha nasa hle.