Taiwan hotu zin vangin China lawm lo hle

China chuan Taiwan Vice president William Lai-an United States a tlawh chu na taka chhanletna siam an tum thu a puang a, uluk taka a thlithlai reng thu a sawi bawk.
Lai hi kumin Taiwan presidential election neih tura beiseiawm ber zinga tel a ni a, Paraguay a president-elect Santiago pena lakluhnaah tel dawnin a kal pahin United States a tlawh a ni.
Taiwan hi China-in a ram anga a chahl niin he thliarkar democracy ram hi engtikawng pawha mainland China nena la insuihfintur a tih niin a tul a nih chuan sipai chakna pawh hman mai a ni ang, a ti fo a ni.
“China chuan thil awm dan uluk takin a thlithlai reng a, national sovereignty leh territorial integrity hum him nan a tul angin na tak pawhin hma a la ang,” tiin foreign ministry thuchhuak chuana tarlang.
Lai hi Taiwanese President ni mek Tsai Ing-wen ai pawha Taiwan independence tlangaupui nasa zawk niin chu tak chu Beijing-in a huat em em a ni bawk.
Harvard a zirchhuak doctor niin chumi hnuah politician-ah inlet lehin ‘pragmatic Taiwan independence worker’ tia insawi ngat a ni bawk a. Kar kalta pawh khan Taiwan local channel tena an kawmnaah Taiwan chu ‘people’s Republic of China ram bung a ni lo’ tiin a sawi nghe nghe.
“Republic of China leh PRC te hi hnuai zawk leh chung zawk an awm lo” tiin Taiwan official hming a sawi lang nghe nghe a ni.
Pathiannia New York a tum hnuah Lai chuan Twitter tuna X ni taah, “Big Apple, icon of liberty, democracy leh opportunity a khata ka thleng hi ka lawm a ni,” tiin a sawi zui a. Airport-ah hian American Institute in Taiwan te chuan an lo hmuak a ni.
Lai hian Paraguay a pan zui zel a, a hawna lamah San Francisco a tlawh leh dawn nia sawi a ni bawk a. Lai-an Taiwan a chhuahsan hma chiah atangin Chinese military tena Taiwan tuipui leh vansang ram te dan bawhchhiaa an luh hun dang zawng aiin an ti nasa bawk.
Taiwan Defence Ministry te chuan Chinese warplane 33 leh indo lawnglian paruk ten darkar 24 chhungin Taiwan ram chin an lut tiin a sawi.
“China chuan US leh Taiwan tena official-a inbiakna an neih emaw a khap tlat a, Taiwan independence duh seperatist tena US an lut a dodal bawk a, US sorkar leh Taiwanese lam tena official contact an neih a duh lo bur,” tiin China foreign ministry thupuangtu chuan a sawi.
“China chuan US a tlawh theih nana Lai zinna lama ruahmanna a siam chu a duh lo takzet,” tia sawi bawkin Lai chu ‘buaina siamtu’ tiin a sawi bawk.