Mizo Handloom Conclave-ah cheng nuai 130 vel leichhuak

August 7-14 inkar chhunga Aizawla Mizo Handloom Conclave-ah tualchhuak thil siam hrang hrang hralhna atangin cheng nuai 130 vel an leichhuak tih sawi a ni.
Sawrkar laipuiin National Handloom Day lawm tura state tin a beisei angin, Mizoramah pawh pawl hrang hrangin Handloom Day pual programme a siam a. Commerce, Industries department pawhin August 7-14 chhung khan Mizo Handloom Conclave a buatsaih a ni.
Conclave neih hun ni 14 chhung hian tlawhtu mi 75000 vel awm anga chhinchhiah a ni a. Hemi chhunga hralhchhuah zawng zawng hi Rs. 130,00,000 vel nia ngaih a ni.
Sawrkar laipui ruahman angin, kum 2015 atang khan kumtin August 7 chu National Handloom Day-a hman thin a ni a. Mizoram pawhin kumin hian a vawi 12-na atan a hmang a. Commerce, Industries, Geology & Mining department-in buatsaihin, August 7 khan Industries minister F Rodingliana’n Conclave hi a hawng.
Handloom exhibition-ah hian stall 60 hawn niin, state chhung hmun hrang hrang atangin puantahtuten an thil siam an pho chhuak a. Kum danga tih ngai loh kuminah hian hnam bil pual stall pathum – Chakma, Lai leh Mara Autnomous District Council atangin hnam thil hrang hrang an phochhuak a ni.