Pizza Hut-in pizza lian ber an siam

Pizza siam lama hmingthang Pizza Hut chuan pizza lian zet mai, square feet 13,990 a lian an siam a, Guinness World Records chuan khawvela pizza lian berah an puang.
He pizza lian siam nan hian chhang phut kg 6193 a rit an hmang a, cheese pawh kg 3628 chuang an hmang a, marinara sauce kg 2244 leh pepperoni ni 6,39,496 a an hmang bawk. An siam zawh hnua a len zawng an teh chuan square feet 13,990 a lian a ni a, Los Angeles Convention Center chhuatah an phah duai mai a ni.

He pizza lian siam tur hian team hrang hrang an awm a, heng team te hian pizza a siam tur chhang phut an hmeh ban sa chu kil li nei a siamin, chhuatah chuan an phah zel a, a chungah marinara sauce, pepperoni leh cheese te an dah leh a, chuan a ur dawnah a then hrang hrangin an ur leh vek a, a vaiin hmin tha tak, ei theih vekah an chhuah ta a ni. Pizza Hut President David Graves chuan an pizza lian siam chu zailep 68,000-ah an chhuah niin a sawi.

Pizza lian an siamna chhan sawiin David Graves chuan an eitur siam 90s vela hriat lar tak ni thin The Big New Yorker puala an tih niin a sawi a, he item hi an menu atangin an paih tawh a, mahse, tunah chuan Pizza Hut hian an menu-ah February ni 1 atangin an telh leh dawn ta a ni.