January 22, Pathianni zan khan English Premier League-ah inkhel ngaihven hlawh tak a awm a, hmahruaitu Arsenal chuan tunhnaia khel tha Manchetser United an mikhual. Emirates Stadium a inkhel hmuhnawm takah hun tawp dawn tepa Eddie Nketiah goal thun hmangin Arsenal an chak a. Gunners hian table ah point ngain hma an hruai fal.
-- Advertisement --
Manchester City an chak zawn vanga an inkar a zim hman em vangin Arsenal hian an mualah chak an mamawh a. Season kal meka an hneh loh awmchhun Manchester United hneh let ngei an tum hle bawk. Tunhnaia khel tha, pathumnaa inhlangkai hman United pawh hian seaon kal mekah an muala la tlawm lo Arsenal hneh ngei tumin tan an khawh ve bawk a. Emirates Stadium-ah team lian pahnihten an khel tha dun hle.
Nidang ang bawkin Gunners hian ball an chang hnem a, mawi taka ball inpekual in, an mikhualte an nawr bet. United tlarhnung thiat in, hlauhawm siam thin mahse goal an thun lawk thei lo thung. Goal thun an tum ngawrh em em laiin Arsenal hi goal chhuah hmasa zawkah an tang tehtlat a, hei hi inkhel tihmuhnawm zualtu a ni hlauh thung.
Ball chang tlem zawk United hian Arsenal chetsual an hrem a, tha zetin an nawr let. Manager thar Erik ten Hag hnuaia khel tha tak Marcus Rashford chuan minute 17-na lekah mawi zetin a pet goal a, hmahruaina goal a thun. Rashford hian United tan a khelh hnuhnun vawikuaah goal kua ngawt a thun a, a vul hle.
Goal chhuah hmasa zawka an tan hnuin Arsenal in an puitlin tawhzia chiang takin an lantir a, chiai hauh lovin an mikhualte an nawr let nghal chat a, goal pawh an thun thuai. Mawi leh tha taka ball an inpekkual a, United tlarhnung an kat kual hnuin minute 24-naah Eddie Nketiah chuan Granit Xhaka siamsak tha tak chu chiang zetin a tauh goal a, an si phurh a sut. Gabriel Jesus awm loh lang lo khawpa chetha Nketiah hian hmabak a neih en zia a goal hmangin a lantir chhunzawm zel.
Goal khat ve ve an thun hnuin inkhel a hmuhnawm chhunzawm zel a. Mual laiah an indan tawn nasat vangin goal thunna hun tha an insiamchhuah tam thei lo ve ve. Chawlhlawk hma hian United midfielder Scott McTominay chuan kawh zetin a pet a, goal ngei tura ngaih a nih laiin Gunners si nghak Aaron Ramsdale chuan vanneih thlak takin a lo dang hmang hlauh thung a, an team a chhanhim. Chawlhlawk hmain goal dang a luh belh thei tawh lova, 1-1 a inhnehtawk chungin chawlhlawk an hmang phawt.
Chawlhlawk hnu lamah Arsenal an khel tha leh zual a, goal pawh an thun thuai. Minute 53-naah player hmuhnawm Bukayo Saka chuan mawi zetin a pet lut a, Arsenal hmahruaina goal a thun. An elpui lian lakah hma an hruai vangin Gunners an phur thar hle a, an mikhualte an nawr tawm zui viau bawk. Hma an hruai vangin phur hman viau mahse hma an hruai rei thei bik lo thung.
United hian corner an hmuh an chhawr tangkai a. Gunners si nghak Ramsdale ball tawh per chu defender Lisandro Martínez chuan minute 59-naah fing zetin a tauh goal a, an si phurh a sut. An si phurh an sut hnuin United chak theih beiseina sang zawk an nei a, Gunners in chak ngei tumin thapui an thawh bawk nen inkhel a hmuhnawm zui hle.
An hmahruaina tizau tura chak mamawh tak Arsenal hian point thum hmuh ngei tumin tan an khawh a, United an nawr bet hle. Hun tawp dawn hnaiah hnaite atanga Nketiah bet chu si nghak David de Gea chuan tha zetin a dang a, an team a chhanhim phawt. An hun tha hlah mahse Arsenal a beidawng lova, hun tawp dawn tepah goal an thun ta nge nge. An player thar Leandro Trossard ball pek fing tak chu defender khel tha zet mai Zinchenko chuan tha zetin a siam lut zui zat a. Chep tak kara captain Martin Odegaard pet chu goal line bul lawka awm Eddie Nketiah chuan thaikawi zeuhin, minute 90-naah hma an hruai nawnna goal a thun. Arsenal chakna goal hi VAR hmanga ennawn a nih hnuin pawm a ni a, Gunners hian an chakpui zui ta nghe nghe a ni.
An elpui lian Manchester United an hneh leh tak vangin Arsenal hian point ngain an hmahruaina an tizau a. Khelh 19 atanga point 50 an hmu tawh a, an elpui lian Manchester City leh Manchester United te aiin vawikhatin an khel tlem zawk mek thung. Arsenal lakah an tlawm vangin United hi palinaah an tlahniam ve thung.