An mualah United an chak

Thawhtan zan khan English Premier League (EPL) ah inkhel pakhat a awm a. Team ngaihven hlawh Manchester United chuan Old Trafford-a an mikhual Wolves hi defender Raphael Varane goal thun hmangin an hneh. Old Trafford-ah an tlawm tum hian penalty pek an nih loh vangin Wolves an lawm lo hle a. He inkhela match referee te hian hrem an hlawh zui nghe nghe.
Old Trafford-a lenglut Wolves hi season tan dawn ruaiah an manager Julen Lepotegui-a’n a chhuahsan a. Manager thar atan AFC Bournemouth manager hlui Gary O’Neil an ruai thar chuk chuk. Manager thar hnuaiah inbuatsaihna tha nei hman lo an ni a., Saudi Pro-League lamah an player pawimawh an hralh a. Player lak mumal an la neih bawk si loh vangin United lakah harsatna tawk deuh nak tura beisei an ni a. Point an hlawhchhuah zawh loh lanna a lian lawk viau.
Hetihlai hian United hi manager Erik ten Hag hnuaia hmasawn chak tak, an player te pawh inhrechiang sa an ni hlawm. Heti a nih vang hian an mualah harsatna lian tawk lova an chak theih beisei a ni. Rin lawk angin United hian point thum hmu tho bawk mah se, khel chhe zawk an ni tlat thung a. Vanneihthlak taka penalty an chawi lo kha an vanneih lehzualnaah an chang zui ta bawk.
Manager thar Gary O’Neil hnuaiah Wolves in bul an tan tha viau a, mualneitu United aiin an hmuhnawm zawk. United midfielder te an chetha tawk lo va, Chelsea atanga an lak Mason Mount pawhin beisei a phak lo va,a khel tha tawk lo. An midfielder te an khelh that loh vangin an tlarhma player te an hlauhawm tawk lova, an tlarhma player te an tlan let thatchhe tel bawk nen beisei an phak lo viau.
Hmuhnawm taka inlan Wolves in goal thun tum viau mah se a tawp an khar tha thei lova, goal chhuah hmasa zawkah an tang ta hlauh thung. Minute 76-naah Bruno Fernandes chuan fuh takin Aaron Wan-Bissaka ball a pe a. Bissaka hian defender Raphael Varane tan tha takin a chhawp zui leh zat a. Varane hian hnaite atanga tauh goal in, hmahruaina goal a thun.
Khel tha zawk ni chunga goal chhuah Wolves in an si phurh sut tumin tan an khawh zui chiam a, team lian zawka ngaih United an nawr bet. Hun pek belhah Wolves hian penalty hlawhchhuak ngei turah an inngai a. United si nghak thar Andre Onana chuan ball nam chhuah a tumna lamah ball khawih fuh si lovin Wolves Sasa Kalajdzic darah a chum ngheng a, a foul. Onana hi foul chiang viau in, penalty chawi ngei tur ni mah se hun rei tak VAR rawn a nih hnuin foul lo a ngaih a ni teh tlat a, first referee Simon Hooper chuan penalty a pe lo. Penalty an chawi loh hlauh vangin United an him tluan a, point thum an hmu zui ta a ni.
Referee te hrem an ni
Tarlan tawh angin Wolves player Sasa Kalajdzic laka a foul vangin United si nghak Onana khan penalty chawi ngei tura ngaih a ni a. Penalty hmu se Wolves in Old Trafford-ah point hmuh theihna hun remchang an nei. Old Ttafford-ah point hmu se team lian laka point hmu an nih miau vanin season tawp thlenga an dilhmun hril theitu a ni thei. Chuti a nih laia penalty pek an ni lo kha an tan chuan uiawm tak a ni.
Sasa Kalajdzic lakah Onana chet dan hi uluk zawka ennawn a nih hnuin foul ngei a ni a, penalty chawi ngei tura ngaih a ni. Penaly pek ngeina tur a ni chunga an pek loh a, tihsual lian tak an neih vangin United leh Wolves inkhel tuma referee pathum te hi hrem zui an ni a. Tunkar tawpa EPL-ah official an ni thei dawn lo. Heng an hrem takte hi first referee Simon Hooper leh VAR viltu pahnih Michael Salisbury leh assistant VAR Richard West te an ni. An referee ten tihsual lian tak an neih vangin Professional Game Match Officials Limited (PGMOL) hotupa ber Howard Webb pawhin Wolves lakah hian thupha a chawi hial a ni.