Vaivakawn Zohnuaiah Bailey bridge

Leimin avanga Vaivakawn Zohnuai kawng hman zui leh mai theih tawh loh tura ngaih chu state PWD-in Bailey bridge dawh a tum dawn.
State Executive Committee an chairman, chief secretary Dr Renu Sharma kaihhruaia thukhawm chuan Mizoram hmun hrang hranga ruahsur nasa kaihhnawiha chhiatna thlen dan leh sawrkarin a hmachhawn a, chhawmdawlna a kalpui dan an thlir ho a. Mizoram DGP Anil Shukla, a kaihhnawih department hrang hrang hotute, District Disaster Management Authority Aizawl bakah district danga DMA-te pawhin inbiak hmuh theihna hmangin an zawm a; district dinhmun an report a ni.
Vaivakawn-Zohnuai leiminin NH-06 a tih pin dan leh harsatna lian zawk a thlen lohna’n PWD leh traffic thuneitute rim taka thawkin, lirthei lian tiamin rei tak dan an nih lohna’n hma an lak thu te; leimin hian vengchhung inkalpawhna a nghawng lutuk tur phuhruk nan two-wheeler tlan theiha lei dawh a nih thu te; leiminin a hnawl Vaivakawn Zohnuai kawngpui chu siamthat mai theih tur a nih loh avangin PWD-in Bailey bridge dawh tura a ruahman thu te sawi a ni a. A tul anga lo enzui zel turin a kaihhnawih department te hrilh an ni.
Khawthlangtuipui lianin Tlabung RD Block huamchhung a tihbuai dan leh chhawmdawl hna thawh dan report a ni a. Khawmawi khua, Tleu khuaa tuilian leh quarry chim vanga harsatna thleng pawh sawi a ni.
District tin thuneitute chu khuarel chhiatna lo thlengah a theih ang anga chhawmdawl hna thawk a, ruahsur nasa tak lo thleng leh thei mekah pawh mahni district theuh uluk taka vil turin chief secretary hian a chah.
Vaivakawn-Zohnuai Aizawla leimin nasa tak, Lungleia Tourist Lodge panna kawng leh Lawngtlai Electric Veng lei tlahniam te National Disaster Management Authority lama thlen dan tur pawh ngaihtuah nghal a ni.